Op Krankeschien

Billa hat fiese Ping am lenke Poot of öm jenau te sien,
an de Tehn näewe de dicke Onkel.
Billa koom net mehr en ehr Lackpömps met die hohe Hacke ren.
Männi, der sinne Mann, sait:
"Do motts dech mar net wongere, wenn de Elsterooge kriss!
Bee son enge Schuhn blivt dat net uut.
Wä schön sien well, mott och lie:e könne"
Männi duckde sech flöcks on on dä lenke Pömp van Billa
flog effkes an sinne Kopp langes.
Twee Wäeke laater wor et dann sowiet.
Billa koss bloos noch an de reihte Poot enne Pömps verdraare.
An dä lenke Poot koss se jraad noch enne Schluff uuthalde.
Ba, wat deng son Elsteroog piere.
On wat van wiese Sprüchskes se sech aanhöere moss.
"Do hölpt mar bloos en alde Pätt,
wenn de die bee de nächste Vollmond dropsette deest!" sait Liesa.
"Du motts met näcke Pöet öwer Brennessel loope." mennde Berta.
"Nä! Schöll- of Frattekruut es et bäes!" reep Dora.
" Nähm Schwedenbitter!" deng Pitter rooene. "
Drei Dag emmer tehn Droppe van dat schwatte Zeuch op dinne Tehn,
jlöew et mech, dat Elsteroog fällt van selwes eruut!"
Mar nix holp. Dat fiese Deng feng sojar an te schwäere.
Nau hömpelde Billa no Dr. Pillemann.
Dä sait:" Aha, soso, ein Hühnerauge. Hier hilft nur noch eine Operation.
Bevor ich aber schneide, wollen wir das Ding 'mal einweichen."
Billa soot jau in dat Käemerke näeweaan on
heel ehre wehe Poot en en Schöetel met wärm Waater.
Op dä Stohl donäewe sooet en ald Mütterke onger de Ultraschall.
Dat bekeek sech dat Speel.
Wenn no fönf Minüdde en Karbolmäuske de Poot van Billa avdrüeje deng,
schöddelde dat Mütterke met de Kopp:
"Do kalle se all van Jesundheitsreform on Kostenspaare.
On nau dat: Pöetwäsche op Krankeschien!"