Die Körner Kur

Bee Fläpkes es Qualm en de Buud, doe hängt dä Huussäeje scheef. On dat alles wäejes en paar Pöngkes. Die hät Manes nähmlich te völl. Frieda sätt: "Op dinne Buck kammer bald en Faat avsette!"
No mott mer weete, Frieda selws es en Jitsch. On enne Kopp jrötter als wie Manes. Die mot onger de Braus hin on her loope op dat die naat wörd. Die kann alleen vör lauter Jeff öwer Manes sinne Buck net aansette. Se beierd van morjes bes owends. Bloos, wenn se Loff hooele mott, es Rauh: "Do deest völl te völl äete.- Am Stammdösch hässe jiester bestemmt wier en Iesbeen verputzt. Van't suupe well ech ja net kalle. Bah, wat hässe des Nait jestonke. - Lott de Äerdnöet uut et Liew. - Stött dech den Oos? Schmeer de Botter net so dick. - Een Fläsch Bier es satt.- Schött dä Wien net so en Dech erren.- Do fretts on süpps dech krank.- Denk an din Jesongheit. - Do moss avnähme!"
Dat jeng Manes fies op de Nerve on nau flippde hä uut: "Et es jood möjelich, dat ech en bettsche te fett ben, mar Do, Do bess potthäßlich. De Ongerschied es, dat ech avnähme kann, wenn ech bloos well." Dat hai Manes net saage dörwe. Nau wor hä riep. Hä hatt wat jood te maake. Hä wor met en Fastekuur enverstange. Frieda sait: ab morje mekste en "Körnerkur."
De eeschde Dag enne Dätsch van Weet, de twedde Dag opjekokde Hirse met Peterzillich, de dridde Dag Hawer met jereewene Äppel, de vierde Dag met stiefe Ries on Kaneel, de fönfde Dag met Jeesch on en paar Bananeschiewkes, de säesde Dag met jequollene Dinkel on wat Käes on am letzde Dag enne Mischmasch van all de Körner tesaame zeichde de Wirkung. Manes feel bald vam Fleesch on de Stammdöschbröer öwer Manes her: "Enne Mann met ohne Buck, dat es kinne Mann. Do bös och jan net te schwoer mar bloos jet te kleen. Körner send bloos jood vör de Vöjelkes.
Manes wor quoed: Hä reep de Kellnerin: "Liesa, senge on flöete kann ech all on eh ech nau anfang och noch te fleeje, breng mech mar ens en lecker Iesbeen met suure Kappes!"