Manes hatt Buckping. Angerndags soet Manes vör sinne Doktor. Dä keek öhm en de Ooge, tastede dä Buck af on sait: "Ja, Manes, do häs en neurotisches Syndrom, läew mar ens wat solide. "Mer hant vanowend äwer kejele. Dörw ech ja kinn Schnäpske on Bierke drenke?" "Nä", wesselde dä Doktor, "kin Bier on och kin Schnäpske, drenk dech mar en Jläske Rotwien."
Die Kejelbröer verstonge de Welt net mehr. Manes drongk Rotwien. "Woröm dat?". "Wäejes dat ech en Syndrom em Buck hann!" sait Manes. "So so, en Syndrom em Buck", jröselde de Kejelbröer.
Manes moss no't Hüske. On wenn hä dovan teröck kooem, deng hä sech jett wongere. Dä Dösch wor ratzekahl avjerömd. On eh hä wat saage koss, packde däm drei Mann on denge öhm op den Dösch leeje. Se heele em fass, dat hä sech net rebbe koss. Twee angere trocke öhm de Box ronger Nau kooem Wellem met en Mostertpöttsche, klatschde dä Mostert op Manes sinne Buck, Jupp deng dat joodverstrieke. "So, Männeke, dat wör et on hei es oser Rezept: Stein-Pils-Mostert-Kur för Manes."
Manes moss die Kur met en Runde Steinhäger on Pils betahle. Nau jooew Wellem en Runde, nau Strieker Jupp, noe-eneen kooem Runde op Runde. Se hadde Fück wie lang net mehr.
Wenn se noe Huus wangde, wore se net besooepe, nä se wore dress. An dä Mostert op dä Buck hatt sech Manes all jewend, bloos sin Frau wor met die Ferkesseree net enverstange. Laater trooef hä Wellem: "Na Manes, wat mäkt et Syndrom?" Doe feele bee Manes de Jrosches: Hä hatt ja kin Buckping mehr.
On wenn de Kejelbröer et näxde Kiehr met en Pöttsche Mostert wenke denge, sait Manes: "Seit de letzde Stein-Pils-Kur send de Buckping wie wegjeblooese." Wie hett et so schön: "Schütt de Sorje en en Jläske Wien, en bettsche Mostert dörw och noch sien........"

^ Zur Übersicht

Will mer Päedes züchte, mot mer en Jestütt han möt enne staats Stambaumhengst on en Koppel voll Stute. Dat alles wor Männ sin eeje.. Te- eesch fluppde et och. Do wore all somännije jesonge Fohlen op de Wei.
Mar dann joow et en Problem. Dä Hengst wollde net so als wie Männ wollde. Dä trabde op die Koppel möt Stute, deng hei on doe ens jet schnuppere, mar sons nix. Hä trabde terück en sin Box on deng den Haver ratzekal opfräete on dann en Nükske maake.
"Waat Männeke, dech breng ech wahl op Trab, " sait Männi.
Angeren Morje braiht hä en rassije Stute van de Koppel direktemang vör de Stall van sinne Hengst. Dä kooem uut de Boxschnupperde, drehde sech röm on frooet sinne Hawer.
Dat alles hat en Madämmeke mötjekreije, die op de Hof te Besöck wor. Sie frogde Männ: Kommt dieser faule Hengst vielleicht aus Cloppenburg?" "Nä" wesselde Männ, " minne Hengst kömmt jewess net uut Cloppenburj.
Näxde Wäek dat selwe Speel. Dä Stammboom-Hengst deng schnuppere, mar sons nix. Och dat Madämmeke wor wier present. "Also dieser Hengst stammt doch aus Cloppenburg." Männ wor qood. Ärjerlich deng hä dat Madämmeke wiese, dat dä Hengst net van Cloppenburj köeem, hä hei däm van en bekennd Jestütt en Bayern. Madämmeke wor äwer drei Dag laater wir op den Hof van Männ. Dat selwe Speel. Dä Hengst schnupperde, on schluffde en sin Box teröck. "Hi,Hi", kicherde dat Madämmeke, "Dieser faule Cloppenburger stammt nie aus Bayern.
Nau word Männ äwer fies fuchtich."Minnn Hengst han ech janz jewess in Bayern jejolde. Wie kommen Sie eigentlich dazu, hier hartnäckig zu behaupten, der Hengst käme aus Cloppenburg.
Dat Madämmeke schmeet sech en de Bross: "Selbstverständlich kommt Ihr Hengst aus Cloppenburg, weil mein Mann auch aus Cloppenburg kommt!"

^ Zur Übersicht

Bee de letzde Reis mem Bus meeke mer enne Stop en kleen Dörpke. "Alles aussteigen", tönde oseBäereleier, "wir besichtigen erst die alte Dorfkirche und dann machen wir eine kleine Wanderung über den Dünenweg bis zum Aussichtsturm!" Wä footlahm wör, brugde net metteloope. Dä köss em Bus sette bliewe on bes no de Toorel fahre. Mar nömmes wollde dat. Se wöre all jood te Foot.
Die Kerk em Dörp wor wörklich schön ald. An de Orjel haude jömmes en de Taste. "Dat es von Bach!" sait Lotte. Mar Bäetes mennde: "Nau wolle mer doch de Kerk möt dä Bach em Dörp looete on loope." On dann öwernohm hä de Spetz, wäejes dat ose Bäereleier am Eng van de Jrupp bleewe wollt.
Nau es enne alde Mann kinne D-Zoch on en alde Frau kinne Intercity! On so jenge se jemäcklich öwer de enge Sangkwäech op de Toorel aan. Sojar en Möchtijall deng flöete. Mar op eemol en opjereeschde Stemm: "Wo es min Frau, Wo es min Frau, min Frau es fott!"
Ose Bäereleier deng de Mann beruhije: "Hier ist noch niemand weggekommen" On dann kooem noch dä wiese Sproch van die tehn Perzent Schwund, die janz normal wöre! "Wie heißt denn Ihre Frau?" wollde hä nau weete. "Dat es doch klooer, die hett jenau wie ech Schmitz!" "Nein ich meine mit Vornamen?" "Lisbett!" Dä Bäreleier rasde no vöre die Jrüppkes langes: "Ist hier eine Lisbett Schmitz?" Wenn hä an de Spetz bee Bäetes aankooem, wor doe och kin Lisbeth.
Hä wor nau janz uut de Oehm, wenn weer näewe Herr Schmitz stong. " Also vorne ist Ihre Frau nicht. Nun will ich zurück zum dorf laufen und Ihre Frau suchen. Wie sieht ihre Frau denn aus?" Dä Schmitz meek en Frimp. "Jo, wie sütt min Frau wahl ut?" Und dan zeichde hä met sinne Steck op die Fraues von oser Jrupp on sait: " Jenau wie all die angere doe vöre och!"

^ Zur Übersicht

Fönf Frönde, nenne mer se Pit, Jus, Schang, Henn on Bäetes, kannden sech all dressich Johr. Dat denge se jerejeld fiere. Se leeteden Bäer los on jenge angerte Morje op de Brosswarze noe Huus. Bloos eene Dag later, denge se schwöre, sech alle tehn Johr, örjeswo te treffe, öm dat als Jubiläum te fiere.
Wenn nau die veezich an de Reih wor, denge se rooene, wat, wo wie te fiere. Pit sait: " Ech meen, dat mer os des Johr in dat Restaurand Dat Jröene Päed treffe. Do es en dralle Kellnerin, die ratteschärp es on die en Blüske aan hät, wat öch de Ooge öwerloope lött. All wore se enverstange. Die ratteschärpe Deen deng se jood bedeene on all kreije se heete Öhrkes. Et wor enne jelongene Owend.
Wenn nau de Fönfzichste näher kooem, denge de Frönde palavere, wat te donn wör. Jus hatt die Idee: "Wedder wat, meer jonnt wir no Dat Jröene Päed. Dat es et eeschde Restaurang am Platz on die hant en Speisekaat, die sech sehnn looete kann. On die Wienkaat hät so männij jood Dröpke te biene." Se worden all puupsatt on Wien hadde se mehr als jenoch jedronke. Se wore tefreene.
Wenn se die Sässich fiere wollde, wosse se net so reith, wohin. Do mennde Schang.: Mer jonnt wier en Dat Jröene Päed. Dat es en rauhig Restaurang on do wörd net jeschmockt. Et word enne rauuhije, mar nette Owend. Se wore all op de Tied te Huus.
Mar wat wollde se nau op et dä sibbenzichste Jahresdag maake? Henn sait: "Kinn Problem, mehr kehre bee Dat Jröene Päed en. Do könne mer em Rollstohl jood erren on die hant sojar enne Lift." Jesait, jedonn.
Mar wie soll et nau be de Aachzichste affloope. Wann, wie, wo.? Do sait Baetes janz höeschkes "Ech schlag ösch vör, mer johnnt no et Restaurang Dat Jröene Päed." "Prima," reepe all, "dat es enfamose Idee, doe wor mer doch noch nie."

^ Zur Übersicht

Ech wor en janze Büx Jlücksklee am drenke. Nau soll et Jlöck wahl kommen. Mar et kooem net, bloos bee de letzte Schluck jooew et et enne Knall on dann sooet vör mech en kleen Hutzelmänneke. Dat sait: "Köebi, Du hast mich erlöst, ich sass fest auf dem Grund der Dose. Nun bin ich frei und Du hast einen Wunsch frei."
Ech deng en janz lange Tied öwerleeje. Dan feel dä Jrosche: "Leew Männeke, Ech mööt, dat et janze Terreng von Kapelle bös henger Oppum, wo mer die A 57 bree-er maake well, FFH-Jebiet wörd. "FFH-Gebiet, was ist das?" Ech deng dat expliziere: "Em sojennende FFH-Jebiet läewe seldene Dieres on do waahße seldene Plante. On wäejes dat dörwe em FFH-Jebiet bree-ere Strooete bloos jeplant wäede, wenn doför enne Tunnel jebaud wörd. "Welche seltene Tiere- und Planzenarten müßten denn da geschützt werden?" Ech sait: Dat es för en Beispiel dä Dunklewiesenknopfameisenbläuling. Wäejes däm on wäejes de besongere Jeolojie van dat janze Latumer Bruck hant se die Autobahn bee Ilverich onger de Aed jeleiht." "Haben denn dort auch Menschen gewohnt?" " Eijentlich net, dat wor mar bloos die sojenennde "schutzwürdige Natur".
So, so sait dat Männlein, nur die Natur ?? Lebt denn der Dunklewiesenknopfpameisenbläuling auch an der A 57? "Nä. nä" wesselde ech, "mar doför wohne do janz völl Mensche, bee denne die neue Fahrbahn bald duur de Wohnes fährt." "Ja, das ist sehr schlimm," sait dat Hutzelmänneke, "aber auch ich kann die A57 in Krefeld nicht nicht zum FFH-Gebiet machen. Am besten wäre allderdings, wenn die betroffnen Menschen in die FFA-Artenliste aufgenommen würden. Aber das kann nur der Bundesverkehrsminister. Ech sait: " Nä, selws wenn hä et köss, hä deng et wahl net. Hä mennt: kinne Tunnel för die Mensche in Kreweld!?"

^ Zur Übersicht

Et jooew och bee os en Tied, wo sech Katholicke on Evanjeliche netjröen wore. Net dat se sech als wie en Nordirland todjeschooete haie, mar möt dä Luther sin Reformation kooem och dä Knaatsch. Och bee os send enne janze Hoop Lütt wäejes dä Relijion opsjejange. Hütt send mer hei wennistens all sowiet, dat Katholike on Evanjeliche ens tesaame en een Kerk bäene.
Als kleen Jöngke hat ech noch erläwd, dat Katholike on Evanjelisch twee Zoorte Mensche wore. Min Eldere hadde mech em letzde Kriegsjohr no Oma en "Würges" jebraiht. Dat es en kleen Kaff em Taunus. En Würjes wore alle Lütt kattholich on dä Pastuur wor selws bee die Nazis noch enne kleene Häerrjodd. Dat Nachbardörp van Würjes es "Walsdorf". On en des Dörp wore se all evanjeelich. Noch vör sibbenzich Johr sprooek kinne Würjeser met enne Walsdorfer on ömjekehrt. För os Blage hedde dat: "Komm mar bloos net öwer de Grenz.
Wie jesaiht. Et wor Krieg on all die, die kinn Buure wore, hadde wennich te biete. An eene Dag sait Oma: "En Walsdorf gibt es heute Pferdefleisch. Hier, hast Du zehn Mark. Lauf nach Walsdorf und bring soviel Fleisch mit wie möglich." Jäer bön ech net jejange. Mar dann stong ech doch en die Schlang vör dä Pädsmetzjer. Ech wor bald an de Reih, doe sait son Walsdorfer Börschke: "Saag emool, kimmst dau net von Werjes?" Ech schöddelde möt de Kopp. Dat hai "Jo" on och "Nä" bedüe-e könne. Mar dä Walsdorfer Freemel wor hartnäckich: "Dau bes doch katholisch?" Ech schöddelde wier möt de Kopp. Mar nau hät dä leewe Jodd mech en richtije Antwort op de Tong jeleit. Ech sait laut on deutlich: " No, no, eich sein kajeelich!" Dat höede de Metzjer. Hä lachde on jow mech enne ordentliche Rammel Pädsfleesch. Dovan hatt Oma suure Julasch jemäkt on dä hät mech sojar jeschmeckd.

^ Zur Übersicht

Nau wor ech enjelaade för en "Rheinische Kaffeetafel". Et wor ja kinne jroote Anlass! "Nur so..", hadde Jritt jemennd. Mer sooete nau ronk öm enne jroote Dösch. För jedde Platz wor enne flache Teller, Metz, Jaffel, en blauwitte Kaffetass op en Ongertass möt de jlicke Klöer on en selwer Läepelke enjedeckd. Medden drop stung nau: Krenteweck, Pottweck, hell Schwattbroot, Muurekruut, Appelkruut, frische opjeschnee-ene Hollänger on Schenk, appetittlich jarniert möt Radieskes on Peterzillich. On net etletz Kanne voll möt Bohnekaffe. "Na, dann wolle mer mal, sait Jritt. "Juten Appettit." Drei Stond hant mehr r(h)einjetafelt, Liköerkes on Klooere jedronke, vertelld on jelachd.
Bloos Henn hatt jett te krakeele. Hä schwafelde mar bloos van en "Bergische Kaffetafel" em Wülfrather Museum. Doejäje wör de "Rheinische" enne laffe Krooem. Dä Krenteweck deng doe "Blatz" heete, wat enne Kasteweck wör. Op sonn Schni-e van dese Blatz deng mer fengerdick de jode Botter schmeere. Dodrop et Kruut möt Klätschkäes on do noch bovendrop stiewe Ries möt Zucker on Kaneel. Dö wör och net bloos Schenk on bellije Hollänger op den Dösch, nä alle Zooete van Woosch on Käes köss mer sech op en deftij Schwattbrood on och Jraubrood läeje. Besongesch lecker wöre och de Waffele van weeten Mähl. Die möt Honnisch on Flöetekäes, dat wör en Jedicht.
Dat Jesich van Jritt word emmer länger. Wat vane onjerejelde Patron. En Rheinische Kaffetafel es nau ens kinn Berjische. Mar dann hatt se en Idee. Se sait: "Henn, du häss mech op de Köer jebraiht, mech löppt et Waater em Mongk tesaame. Wittse wat, näxde Wäek fahre mer all noe Wülfrath on du spendiers os die berjische Kaffetafel." On domet wore all de Jäss ärj möt enverstange on waade nau op Henn sinne Bescheed.

^ Zur Übersicht

Öwerall, wo mer Böcker köppt, kammer fö5 15.90 euro Hefkes jelle, womet mer de Jastronimie kenneliere kann. Met dat Heffke jehst met din Fräuke en´t beste Restaurang on leggst dat Heffke, direktemang, noch bevör du jett bestelle deest, am beste medde op den Dösch. Brengt dech dä Ober dann die Kaat zeichst mar deutlich op da Heffke on säss och noch: "Wir haben hier das Heftschen mit dem Gutschein: Zu Zweit essen, nur einmal bezahlen." En de Rejel nickd de Ober on du kannst nau en aller Rauh dech jett uutsöke. Et bäes dobee es, för et Fräuke jett för 19 Euro te söeke, on för dech selws jett för 18.95 Euro. Da bestellste, deest lecker Äete on och jett dobee drenke, on wenn de Rechnung kömmt, dann trennt dä Ober dä Jutschien uut dat Heffke on du betahllst bloos die 19 Euro on dat watt ehr jedronke hatt. Dat Äete för 18.95 ist dann fär lau. So wied so jood.
Liesa van Feschele hatt Jeburtdag. Se sait för ehre Männi: "Heute bleibt die Küche kalt, wir gehen in den Wiener Wald." Mar dä ston net end Heffke. Dröm sökde se sech de Winkmannshoff en Lenn ut. Dä es bekennt för lecker te äete. Liesa wengde all en de Düer met et Heffke: "Hier is et aber voll" sait Männi on doe koem och all de Ober em Frack: "Tut mir sehrleid, meine Herrschaften, aber wir haben heute eine geschlossene Gesellschaft. Können Sie nicht morgen noch einmal reinschauen."
Die twee trocke den Dyck av. "Wat hammer denn noch frei?" frogde Männi. "Dat Fischerheim op de Nieperstrooet; wesselde Liesa on doe wore se och all op de Wäej dohin. Em Lokal wor net völl loss. Liesa wenkde met et Heffke: "Dürfen wir uns auf die Terasse setzen?" Mar dat jeng net wäejes doe net enjedeckd wör. "Aber da sitzen doch Leute!" Mar och dat holt nix. Die heie jett te bespräeke. Och benne kosse se sech net sette, wo se wollde. en resolut Frommisch deng denne dann etletz en Katzdösche wiese, wo för twee Lütt dropp jedeck wör. Dä Plätz wore net ärj kommod. Liesa hai jaer no buute jekeeke. Liesas Mankel wolld dat Frommisch jraad no de Jaaderoob brenge, do frogde Liesa, of se ehre Stohl an die anger Kant van de Dösch sette dörft, wäejes dat se dann no buuete kieke köss. Do word dat resolute Frommisch rotzisch fresch: "Was wollen Sie eigentlich. Erst passt ihnen das nicht und dann das nicht. am besten gehen Sie wieder nach Hause!" Dann schmeet se noch dä Mankel op de freie Stohl. Dat wor klor on deutlich.
Die twee fuhr met leere Maag teröck noe Feschele. "Ich habe noch zwei Frikos im Kühlschrank! On dann noch : "Ob die unsere Heffken nicht mochten?"
Männi deng sin Frau tröeste: Et hatt sech doch schon längs bezahlt jemacht!"

^ Zur Übersicht

Vörrije Week feel mech wier en ald Sparbock van mech en de Fenger, wat ech eejentlich nie mehr aankieke wollt. Dat Böckske es fass so ald wee ech. On wenn ech ens stäerwe mot, jeht dat als "ohne Wert" en de Äervmass, wäejes dat en eejenötzich Böckske es.

Bevör ech öwerhaups bejreepe hat, wat Jeld bedütt, do hatt ech all en Spaarbock. On dat koom so: als ech en de twedde Klass von de Volksscholl jeng, joow et enne Fritz Wächtler. Dä nannde sech "Reichsverwalter des N.S. Lehrerbundes" on hatt de Parole utjejoove: "Jungens und Mädels seid sparsam!" On domet kreich ech en Böckske van de Städtische Sparkasse Krefeld. Do dropp stong: "Schulsparbuch" on de Nommer: 14217. Minne Naam on de Scholl "Nr. 1 " in Kreweld op de Felbelstroot hatt min Moder enjetraage. De eeschde Enzahlong wor am 29.4.1940. Dat wore twee Reichsmark! Dat janze moß dann min Moder ongerschrieve on dann dat Frollein Flintrop. Dat wor min eeschde Liehrsche. De hat roode Hoor on en schrelle Stemm.

En de Reejel joov mech min Moder jedde Week enne Mark fuffzich on och all ens fönf Mark met no de Scholl. Wenn et Chreskenke dojewess wor, dann kosse dat och fönfontwentig Mark sin. Als ech met avjekoome

wor, brait min Moder 185 RM persönlich no de Spaarkass. Fröllein Flintrop hätt am 21.6.1943 et letzde Mool tehn Mark ongerschreeve. Bloos eene Dag later hannt die Tommies och die Scholl op de Felbelstroot klatsch kapott jeschmeete. So koom ech all 1943 no Oeding. De Stadtscholl en de Patersjatz mäek de Quatsch met dat Schollspaare net met. Äwer min Moder wor en sparsame Frau, die joow "min Jeld" net so effkes ut. Se brait et leewer wier noe de Spaarkass. Et letzde Kehr wor dat am 6.12.1945. Honged Mark met Stempel on twee Ongerschrifte quettiert.

So wore en fönfenhalw Johr janz jenau met Zense on Zensezense 878 Reichsmark on 80 Reichspenning tosammejekoome.
Em Naßlaß van minne Vader fong ech min Schollsparbock met 878, 80 Reichsmark drop. Ech hann mech dat Böckske ens jet nöhder anjekeeke. Eechd loos ech ens de wiese Sprüch, die en dat Böckske schwatt op witt stonnd. De klenge net schleit. "Das Sparhaus des Kindes wird zum Wohnhaus des Mannes "of "Wer euch sagt, daß Ihr anders reich werden könnt als durch Arbeit und Sparsamkeit, der betrügt Euch." of "Spare, um zu kaufen, und kaufe nicht, ehe Du gespart hast!" Wenn ech spaare deng, dann köss ech mech och enne Roller of en Fahrrad on noch janz völl mehr koope. Dat steht och do.

Mar dat schönsde Spröckske van all es dat: "Arbeitet nun die Städtische Sparkasse Krefeld, deren Kunde Du bist, aus Eigennutz?" De Antwort steht derekt dohenger: "Nein! Sie hat an Ihre Pforte das Wort geschrieben: Zum Nutzen des Einzelnen, zum Wohle unserer Vaterstadt, zum Aufstieg unseres Vaterlandes.

Dese Sproch mod wall och em Krieg kapott jejange sin. Ech woß zwar, dat töscheduur en Währungsreform wor on dat et nau kinn Reichsmark mehr joov. Doch 878.80 Reichsmark avjewertet met 1:10 braite emmer noch 87 Deutsche Mark on 78 Deutsche Penninge. Räeken ech bloos 3 % Zense för dreeonveezesch (43) Johr,

dann möss ech op dat Bock emmer noch janz jenau 312.89 DM krieje. Hütt wör dat sojar noch wat mehr.

Also, dä Roller of dat Fahrad hai ech jo als kleene Jong för en Läewe jäer jehat. Ech hai mech dat no de Krieg och jlick jejolde. Mar ech hat dat Sparbock net. Of wat hai ech men Moder döcks ens en Jeschenkske jemäckt. Die dronk für ehr Läewe jäer en Tässke Kaffe. 1946 hai ech für dat janze Jeld 74 Lot Kaffe jekreije of för minne Vatter als Schmockes sojar 125 Chesterfield. Mar dat Bock hann ech eesch hütt. "Des Mannes Wohhaus" hann ech och all. Ech hann sojar en Konto bee de "Sparkasse Krefeld". Dat "Städtische" wor bee en Fusion wegjefalle. Wat nau?
Wat sollde ech nau met dat Sparböckske, wat ech em Nachlaß van minne Vader jefonge hatt, aanfange.
Met de Jedanke, die 878,80 Reichsmark, die dodropstonge min Dauter öwerschriewe te loote, jeng ech no de Sparkass-Filiale en de Jartestadt. Dat Mädche am Schalder keek sech dat alde Sparböckske aan! Eenmol, tweemool, dreemool. Donoe keek se mech an, janz klöchtech. Se reep örjes aan, ech jlöw, bee de Zentrale in Kreweld. Nau keek die noch verknötschder: "Die Nummer von diesem Buch ist bei unserer Kasse nicht bekannt. Da kann ich Ihnen nicht mehr helfen!" Ech frochde noch: "Ja, wä kann mech dann helpe?" on jeng en Week laater no de Sparkass en Öding.

Die joow mech dat Jeld, wat min Moder för mech Penning för Penning jespaart hatt, och net wier. Dat kösse se net, saite se. Dann höerde ech noch völl van "Verjährung" , van "Gesetze" on van "Kontenauflösung". Bloos, wat de Spaarkass met min Jröemels jemäkt hätt, dat kos mech och do nömmes saare! Of se wollde et net.

Mar, nau wolld ech et doch jenau weete. Ech scheckde (1991) die Jeschicht on enne Breef em beste oedingsche Platt, dann höerd sech dat alles net so streng aan - an dä böewerschte Chef van de Spaarkass

en Kreweld. Dä sollde wall Platt verstohnn! Of hä mech veroone deng, wo dat Jeld van dat Schulsparbuch 14217 jebleewe es, wat doch mech tojehöerd?

Hä koss et och net. Hä joew dat alles an sinne Revisionsklub wieder. Van denne reep mech och döckser eene aan on wolde de Kontoständ ab 1939 per Silvester weete. Dann schreewe se mech noch enne Breef, dä ech hei net en Platt öwersette kann. Se haie net fasstelle könne, ob min Moder dat Böckske "zur Umstellung angemeldet hat" on dat "fast sämtliche Belege und Akten von abgeschlossenen Vorgängen vernichtet wurden!"

Ech weet hütt emmer noch net, wo min Jröschkes nau jebleewe send. Wäe köss dat wahl weete?

^ Zur Übersicht

En Predischt es dat, wat mer sech dann on wann aanhöre mott. Es en körte Predicht et bäes.En de Kirk höed mer joo:e Predischte, mar och sonn, wommer bee enschloope deet.. Ech luster am lewste op son Predijer, die de Lütt met Schmackes de Levite läese. Mar bloos dann, wenn se net te lang düert. Mer sätt Mer sätt och: lange Preddicht, körte Andachd. En anger Spreckwooed mennt: enne jonge Predijer, en janz neue Höll. Mer sätt och dat dä Buck kinne Predicht mag. Janz Wiese sage: "De Tied es dä beste Predijer!" Dann hann ech noch de Jardinenpredicht jehöed, die meschdens van en Nudelroll ongerstützt wäde soll. Mer kann en Predischt och läse:Sonn looes ech doch neulisch op en Kalenderblättsche. Die hatt wat op sech: "Wat es , wenn et 'Deutschland' te jood jeht? Hüttzedag felld bee os ja nix. Et jeht os so jood, dat jeddereene hätt, wat hä well. Jemaak, jemaak, et jeht den Äesel op et Ies danze. Mar se dont so lang Moodwell driewe, bes dat dä Häerjott kömmt on sätt: Ech well dech Mores beebrenge......!." Mooer, dese Predijer hatt et äwer drop. Dat jeddereene hann soll, watt hä well, dat feng ech en bettsche överdreewe. Wä well kinne joode Verdiens hann? Wä well schon Hartz IV? Mar, jewess wollde dä Predijer saage, dat hütt kinner Kohldampf hann of wie enne Pongel römloope möss. Des Predischt es hütt in. Se köss en Dionysius jenau so jehalde wäede als wie en Zint Pitter of en de Friedenskerk. Ejal wo die Kerk stöng! Die köss för de Katholike, Protestante on och für die jälde, die an nix jlöewe of so donnt. Nau wollder jewess weete, wä on wann son joo:e Predisch jehalde hätt. Dat wor dä Martin Luther en dat Johr 1529. Hä sprook öwer dat fönfde Bock van de Moses. So ald es dis Predischt all.....! Do besse baff, wat?

^ Zur Übersicht

Jratulazion för all de Lütt, die hütt Jebortsdag hant! Dat sind Steinböck akkerat wie die Mensche, die tösche de 22. Dezember on 20. Januar jeboore send.

Van de Steinbocksteht en de Stäereböcker, dat die ärsch vernönftisch, iefrisch on en bettsche op sech bedaiht send. Do köß mer sech drop verlooete, die wösse wat se wollde, haie Jedold on völl Senn för Humor. Mar se wollde och döcks met de Kopp duur de Wangk on se kösse och all ens jett jitzisch sien.
Nau soll mer de "Steinböck" net all öwer eene Kamm schere. En min Stäerebock steht, die sollde mer ens met de Jeete verjlieke. Do jöw et op de een Sitt die flenke Bergjeete, die van dä eene Steen op de angere sprenge,
on en de Felse emmer höejer klömme, för et beste Fuur te fenge.
Op de angere Sitt jöw et äwer och die Huusjeete, die an enne Plock jebonge, bloss en janz kleen Plätzke ringseröm hant, för et Jraas te fenge. So köss die "Bergjeet" jood wat för eene Mark enkoope on dat för vier Mark wier verkoope. On exakt van die drei Perzent deng se dann Pännekefett läewe. Die haie et och kin bettsche schwooer, döckser wat sprenge te looete. Mar die "Huusjeet" möss froh sien, wenn se met enne effe Ärbed ehr Bröttsches verdeene deng.
För för all de Steinböck soll jelde, wat hütt em Horoskop steht. "Wenn Sie heute vergnüglich feiern, dann kriegen Sie auch viel Spaß!"

^ Zur Übersicht

Julius hatt sin Frönde enjelaade no en bekennde Schüer för sinne Sässichste te fiere. No mott mer äwer weete, dat Jul et jood stukke koss. Dem hai jood aanjestange, em Parkhotel te fiere. Mar janz rieke Kreweldsche saage: "Häbbe kömmt vam halde!" On Julius soll sojar jesait hann: "För denne es dä Fäerkes-Buur jraad jood jenoch!" On domet wore de Frönde jemennd, die net bloos wat schenke denge. Nä, die meeke en de Reejel bee sonn Fess emmer allerhang Fück on Spöekskes.
Mar de Frönde hadde jood em Kopp, dat Julius nie metmaake deng, wenn se dä Jassjäewer en Ledsche songe. "Lott dat mar die angere maake." Bes op eemol, wo hä sech enne fiese Jux erlaubt hätt. Bee enn jrood Fess, wat Pitter em Parkhotel joew, hadde de Frönde en schön Ständsche jebrait. Wie emmer hat Julius net metjesonge. Bloos hengerher hatt hä dem Pitter als sin Jeschenk met en Scher uut dat joode Frack-Hemm vöre en janz jrood Lätzke ruutjeschnee-e. Dat hadde Pitter net verjäete. "Waad mar Böesche, dat krisse wier!"
Die Jeburtsdagsfier van Jul koom schlait en de Jäng. Et wor kin Stimmung in dä Lade. Et jooew et kin Ständsche. Pitter hat och kinJedicht jemäkt. Hä hat bloos Billa em Vertraue jesait, dat van Owend noch en Kar Mess ennet Rolle köem. Nau woss dat bald die janze Jesellschaft on all wore se spetz drop, dat de Schüereport nau endlich opjeng on die Kar Mess avjelade wörd. Et word bloos noch van die Kaar Mess jekalld. Net laut, mar Jul kreij et doch met. "Doför send die völl te feig!" sait hä on schnuuwde. On dat wor so. Bes dat de letzde Jäss öm drei Uhr jenge, wor van Mess nix te sehnn on nix te ruuke.
Bloos de Nobbere denge sech wongere, dat em Düstere bee Julius sin Huus en dicke Kaar Pädsmess avjelade word. Medde vör de Düer.

^ Zur Übersicht

Wä möet net jäer riek sin? An Jeld on Jold hängd emmer noch jeddes Häz. On all van Spröechskes öm et Jeld: För Jeld kammer de Düewel danze looete. Jeld paßt en alle Täsche. Völl Jeld, wennij Verstangk. Oppasse mott mer, wemmer van jömmes höed, dat hä mar bloos din Bestes well. Oser Politiker maake sojar Jesetze, wie mer riek wäede kann: Vermöjensbildung.
Ech wolld dat net jlöwe, dat möt dat jesetzliche Riekwäde. Mar minne Frönd Wellem, deng mech nau expliziere, dat ech op dä verkehrde Damper söet. Mer köss wahl domet riek wäde.On dat wör so:
Wäejes dat ech et Suupe doch net sin looete köss, sollde ich bee mech te Huus en Bar opmaake. Wenn ech en des Bar dann de enzije Jass wör, brugde ech noch net ens en Konzession. Dann sollde ech min Frau bloos 120 Euro jäewe, woför die en Kist met twelw Fläsche beste Schabau koope möss.
Van en Kist met twelw Fläsche kreij mer 360 Jläskes Schabau. För een Jläske Schabaudeng ech min Frau eene Euro betahle. Dat wör völl bellijer als en jedde Kneipe. Wenn des Kist dann en twelf Dag leer wör, hai min Frau 360 Euro enjenoehme. "För 120 Mar köppt die dann en neue Kist on dä Ress van 240 Euro deet die op en Sparbock!
Wenn Do dann noch tehn Johr läewe dees on dinne Schabau jedden Dag mar bloos bee din Frau köps on och suupe dees on fälls dann dood öm, dann hät din Wettfrau möt Drenkjeld so aachzichduusend Euro op et Konto. Die nau met bloos fönf Perzent em Johr verzinst, kömmt die jlatt op Honged- duusend Euro."
Hä mennde och noch, dat dat Vermöje wahl hoch jenoch wör, för de Blage jroot te krieje on sech enne neue, äwer solide Mann te söeke. Och deng min Frau dann schnell verjäete, dat se met enne Süeper verhierot jewess wör.
Doe hörd doch jedde Fröndschaff op!

^ Zur Übersicht

Ödingsche Schunkelwalzer
von Andreas Otto Kickers
und orig. Schreibweise

Öding hat von aldersher
immer jode Mot;
geng et och oft krüz on quer,
geng et och wehr got.
Mer sind wie met Pääk geklefft,
knubbeldick annehn;
och et Daak -Profit - Geschäft
brengt os net uttrehn.
Alle Mann an Bood!
Alle Mann an Bood!

Öding blievt Öding, os Städtche am Rhien,
wo köß' et schönder, gemütlicher sien.
Öding blievt Öding, genau wie et wor,
Öding blievt Öding, noch dusend Johr!
(ursprünglich: mer wäde fädig, mer kohm klor:?

Uht em Weste - zackerlot!
blösst völl Rägewengk,
dat dat es os jröttste Not,
wet bald jedes Kengk.
Dräue det et immer do,
doch halt Pool on hoff,
denn om Rohthus do sett jo
ose Aldehoff.
Hä kennt Währ on Wengk!
Hä kennt Währ on Wengk!

Öding blievt Öding, os Städtche am Rhien...

Öding mäckt sech, denkt ens ahn,
hät sojar en Bröck.
Krewel es beteiligt dran,
äwer bloß en Stöck.
Höht ! - Wo es dat Stöck am Eng?
Henge an de Bahn!
Also geht die ganze Bröck,
doch bloß Öding ahn.
En et Ärmke flöck!
En et Ärmke flöck!

Öding blievt Öding, os Städtche am Rhien....


Krewel, Ödings Schwesterstadt
hätt os schrecklich jär;
denn se göwt os Bützkes satt,
so von ongefähr.
Wenn se os so nett beträut,
on met völl Verstangk,
nöhmt de Daakgemeinschaftfreud
bei os öwerhangk.
Flöck om Stauhl geklömmt!
Flöck om Stauhl geklömmt!

Öding blievt Öding, os Städtche am Rhien,
wo köß' et schönder, gemütlicher sien.
Öding blievt Öding, genau wie et wor,
Öding blievt Öding, noch dusend Johr!

^ Zur Übersicht

Ihr send alles Oedingsche Mädsches
Jewess de schönsde hei em Städtsche
Höetsche op de Kopp
Täsch ongern Ärm
et Möngke voll met Oedingsch Platt
Öch halde mer jäer wärm.
Dä Mongk op'm reihte Fleck.
emmer joode Moot
dat es so, dat bliwd so
Dat deet os all so jood!

dem Uerdinger Freizeitpoeten,
der seine Gedanken
in Uerdinger Platt ausdrückte.

^ Zur Übersicht

Nau kammer bald jedden Dag Diskussione öwer dat jeplande
Oedingsche Kohle-Kraftwerk höre. Dä eene es doför, den angere
dojäeje. On jeddereene vertritt sin Meinung mehr oder wennijer
laut. Laut jo, mar och wies? All dont se so, als wenn se möt
Verstangk arjumentiere denge. Also ech kapier dat net. On do
bön ech en bester Jesellschaft. Van Wolfram Vieweg, wat
sojar enne Professor es, soll mer wahl aanähme, dat hä
jelehrd on och jelehrich es. Mar hä bekennd em Blättsche
schwatt op witt, dat hä bee dä Versöck, et te kapiere, fies
jescheitert es on dat hä all die bewongere möss, die et
bejreepe haie on dat och wies on klock jedden sage, wie
mer an Schmitz Backes vorbee kömmt. So of so!
Och ech han versöckd, schlau te wäde on han bee Trianel
aanjefrogt, of et denn stemmt, dat jedes Johr so on so völl
Cadmium, Thalium, Qecksilber, Arsen, Nickel, Blei, Stüff,
Schwefeloxide, Stickoxide uut dä Scharutt komme soll.
En en jroot Kohle-Lajer, wat kin Daak hai, solle 280.000
Tonne Kohle jelajert wäde. Die alde Oedingsche Fuhrlütt, die
ehr Jrömels met Kohleverkoop verdennd hant, haie sech
jefreut wie enne Schneekönisch, wenn se Hoflieferant bee
"Trianel" haie wäde könne. Min Frogeree wor wahl te domm.
Och die, wo all dä Kohl herköem. Velleits uut China?
Bes hütt kin Antwort!

Op de Oedingsche Friedhof solle nau all völl Jerippe
em Jraaw rotiere. Dat stong och so em Blättsche. Mar
dat verwongert mech. Die Doode rotiere on die Oedingsche
van hütt? Die meschde bliewe stell. Die sette wahl op de
Vorsteher van de oedingsche Bezirksvertretung . Dä hatt
jesait, dat dat 800-Megawatt-Projekt alleen 4.4 Millione
Tonnen Kohlendioxid in de Loff puste deng. On dann jlick
hengerher: "Das können wir nicht verantworten!" Sin Wooed
en Joddes Ohr!

^ Zur Übersicht

Wieso solle de Mensche schlaiht sinn?
Wo doch jeddereene de Bestjoode es!

Wie könne de Mensche schlaiht sinn?
wo doch jeddereene de Bestjoode es!

Wieso kann de Menscheet schlaiht sinn?
wo doch jeddereene de Bestjoode es!

Schlaihte Mensche jöwwt et net,
wo doch jeddereene de Bestjoode es

Wennn jeddereene de bestjoode es,
dann mödde de Mensche jood sinn!

^ Zur Übersicht

Jeht man hütt öwer der Traarer Stroot, so kann man sech kaum noch vörstelle, dat de Blaare do - so vör net ens fuffzich Johr - noch op dat bree:e Dreckstrottoir Filleke-Stäeke of medde op de Stroot met ehr alde Ölsardinsches loope of sojar Zucker kläue denge. Äwer dat wor so. Do soote de Alde noch, wenn et schöen wärm wor, ovends op de Dörpel on vertellde sech wat.
Wenn ech von de Traarer Stroot spräek, dann meen ech dat Stöck tösche dat Jeschäff Clemens bes de Bäckerei Düllingen op des Sitt on on op de angere Sitt on turöck von de Laade van Eck bis noem Engels-Büdsche. Dat send so fufftehn Hüeser op dös on achteen op jön Sie. So öwer de Stäez wohnde do so 450 bis 500 Lütt. Fromesch, Männer on Kenger. Janz Alde, Alde, net mehr so Jonge, Jonge on janz Jonge.
Mer jonge bes janz jonge Blaare mennde natörlesch, dat Stöck Traarer Stroot jehöede os alleen. Koome do angere Blaare vorbee, kreije de Prüjel jenau so wie die, die do tutrokke. Bestemmt so lang, bes se bewiese denge, dat se och wat en de Maue hadde. Dann floore de Fetze. Oser Hauptquartier hadde mer op de jroote Bauplatz von Fischer, tösche Weber dann Stelten dann Edeka hütt Schlecker op de Stadtsitt aan on dat alde
Polizeehuus, wo damals Danes met ehr zwölf Blaare dren wonnde, op Busmöhle aan.

Alles wat henger de Buss- möhle wor nohme mer sowieso eesch völl later wohr. Jörtzens Puup, Lüttsches Karl-Heinz, de lange Faßbender, Wilbers Plaat, Weinacht Ibok , Danes Herm, de KlinkesJonges, Kunnes Mimm, dä emmer de Lampeputzer Schröers van dat näxte Traarer-Stroot-Stöck mettbrait, on van de angere Sie noch Zoons Hermann, dä os all emmer de Schuun putze on och sonst de dreckije Ärbei donn moßte. Av on tu spellde de Kroppes-Jonges on Paul Mohr ut em Nejerdörp bee os. De meeschde Prüjel kreich emmer de rotzije Wolfewitz.
Lenzen Woosch, Clemens Tröet, Vinse Möbbel on den äldeste von Süß hadde met os nix mehr te doon. Wenn mer Soldat spellde, daite de sech ehr Deel, die hadde et noch sin mödde on wore döcks noch lang henger her en de Jefangenschaff bee de Tommies of Amis jewes.
Mädsches, de os on die wer ankieke kosse, joov et op oser Traaer Stroot net völl. Do wor Christa Rangs , die Rozisch von Süß; van der dä Vatter wor dä staatse Otto Süß, van dem se saite, dat he enne Kommunis wor. Dann noch de Krügers- on en paar Danes-Mädsches, Kessenich Mia, der ehre Vader Geije spellde on die Kleen Bakes von van de Eck, die pekschwatte on janz lange Zöpp hadde.

Van de janz Alde send mech die en de Erinnerung jebleewe, die emmer met os Blaare jemuld hannt on die mer schlait lie:e kosse: die aal Friederichs, de versoopene Weber, dat Pückelsche, die alleen en een Huus wohnde on dat später de Kerk vermäckt hätt , Zoons Jreedsche, von der se annohme, dat dä Hitler die hät sterilisiere loote, dä fiese Börjaards on de zahnlose Motzheim, dä bee jedde passende on unpassende Jelejenheed sait: "De CU hätt os de Hals jebrooke!". Ech well hütt net mer schläit öwer diss Lütt denke, die wore bestemmt en ihr Ard en Order.
Van de nettere Alde nenn ech stellvertretend vör all de nette Lütt den allde Bäckermeester Görtzen met sinne dicke Buck on dat joe Härt för os Blaare, dem sin Verköeperin, dat Käetsche, Engelen Karl, dä os de Pennige on Jröschkes avnohm on os doför meschdens en beddsche mehr Iis op et Hörnsche deng, die alde Frau Muzzin von dat Fahrrad-Jeschäff on net zuletzt de Frau Bakes, wo mer Zinter Mäete am levste senge jenge. Die alde Frau Clemens, die Jemös, suure Herrenge on "flüsige Seife" verkoppde, wor zwar emmer wat jriesjrämig, äver muule deng die nie met os.
On do wore noch die Dobbelstein on de Nent op dä Eck vör Engelens-Büdche, wo man en de schleite Tiet no de Kriech alles krieje koss. Ech moß do öfter här för en Lot Kaffe of een of twei Chesterfield. Ech kann die "schwatte Händler" hütt net mehr onger schlait of jood ennreihe, äwer von dat Jeld, wonoh se damals jrappschde, hannt de hütt jaranteert nix mehr van.

Mer Blaare jenge in des Tiet no de Stadtscholl in de Paterjazz. Do hadde dä Rektor Marcelli met de Klapp op dat lenke Ooch, dä Lehrer Diepers met die krollije Hoor on och dat Frollein Holt wat te saare. Wat mer do jeliert hannt, dat wiet ich net mehr, äver dat son paar fiese Klante emmer saite: "Et stenkt hä no Holt, wä hätt die Latt!" dat wiet ech noch jood on jlöw, dat ech de Senn von dessen läeje Vertell och hütt verstonn. Em Kriech meeke mer de Schollärbee:e em Bunker op dän Lindeplatz. No dä Kriej kroope mer en de Bunkere, die mer os selws op dä Platz jebaud hadde, wo hütt de Agnes Emmerich schöne Kleer verkoope deet. Jedder hadde do sinne Platz, wo on wann, dat bestemmde die, die et meiste en de Maue hadde. Joow et Striet, dann koom meistens dä alde Danes on mullde met os. Mar, mer lachde däm ut on de Striet wor verjeete. Von des Tiet av wiet ech och, wat de Sproch hitt: Küllekes, Pischkes, Päppkesrühre. So manche "Kock" hanntde Mädches damals dovan jebacke. Schlait es et os dovan nie jeworde, äver als mer drüje Bläer van de Böem op de Kleiststroot en Zeitungspapier weckelde ond dat dann schmockde, do had de Dr. Bardenheuer van de Kastaniestroot op os Stroot völl te donn jehatt. Do wor dat schon wat angesch, als eene van os en die Appethek am Maart Asthma-Zerette orjanisiert hadde. Die schmeckden bäeter on et word os net schlait.

Ech jäew et jo tu: de Bravste wore mer all net. Wenn ech bloos noch doran denk, wie mer, wenn et duster word, da alde Börjards met enne Jummi-Ring, en dicke Schruw on en Stöck Koord met Knöep dren op de Palme braite; on dat bloos, wäjes dat dä dat "Tack-Tack-Tack" an sin Fensterschiev net jäer höerde on och doröm, weil dä sonn helle Stemm hat on net jood loope koss. Trotzdem wor et en Risiko jejeöwer die domme Schellemännekes: denn wenn dä eene van os erweschde, dann satt et wat av. Wat mer ausser Ondöesch sonst noch jedonn hannt? Wie jesait: Fillekestäeke on mörmele en selwsjemäckte Küllekes op dä bree:e Trottoir, henkele, den Dopp sette, Pinau speele, Noe-looepe: "Kläck, kläck do bes!" On met de Mädsches tesaame: "Et koome twei Pantöffelkes, zwi-zwa-zwa!" of "Mutter, darf ich reisen?"

On wat noch? Waaße on Liere, domet mer wat jeworde sind! Ha, Ha, Ha! NS:Wä sech fröh krömmt, kritt och ne Puckel!

^ Zur Übersicht

De Parkstroot en Öding, en osere Städtche,
kennt jedder jood, of Boosch of och Mädche.
De hett so, weil se am Stappark vorbee
no Vennikel führt als bre:e Allee.

Et kömmt en Hochhuus, kött vör de Bröck,
van do ut sütt man de Highway en Stöck.
Reits legt de Metro on Bayer, dat Mahr,
lenks jeht et av no Elfroth on Traar.

De Allee jeht wieder, dann wett se wat enger.
Lenks op de Sitt völl Strüek on dohenger
legt wat jeplant on jebaud seit Jahren
"Da unten im Bruch", en Freizeitanlaare

för Sechler, Sörfer on näckije Weeter,
de sech do sonne, wenn et Weer wat heeter.
Männekes, Wifkes, Blaare on Buure
freizeite do on kieke on luure.

Jeplant on jebaud wöd hä seit langen,
met Enteischnung hätt et anjefange:
En Roderstreck mit Fahrradweje,
en Inselke für Vöjelsjeleje.

Et wör de Idylle fas perfekt,
hai:e de Planer kinn Fähler jemäkt.
Dä Elfrother See es dann bloos schön,
wenn dä Wenk bloos deet vom Weste weh'n.

Doch kömmt dä van Oste, van de Parkstroot her,
so mod ech Ösch saare, dann stenkt et sehr.
Manchmol sojar dusend Meters wiet
no dä föt te kläere jelajerte Driet.

Direkts doneeve, man mot dat so nenne:
dat janz jroote Monstrom för Möll te verbrenne.
On do noch dohenger, verjäet dat nie,
jenehmeschte se Bayer en Jeff-Deponie.

All dat word jebaut no städtischer Planung.
De Politiker dann, met janz völl Ahnung,
jove ehr "Placet" för Möll, Jeff on Driet
on för den See, dä janit so wiet.

On wenn Do nau mennst, dat örjenteene
kre:isch dä Planer an de Hammelbeene,
dann hässe jeirrt; denn drop op dä Orde
es dä bestemmt noch befördert worde!

"Bundesverdienstkreuz"
op et Brösske met Bändsche dran!
Do kannste bloos laut schreie
on "Dienst" janz wiet trecke!

^ Zur Übersicht

Meddwochs on samdes is en Oeding op't Röttsche Maat. Ech jangk doe jäer enkoope. Fresch Jemäus, Obbs, Ärpel, leckere Fesch, jebrooene on för selw te backe, Fleesch on Woosch, Eijer, Käes, jeschnee-e of am Stöck, Blömkes för de Vaas of em Pott, Köekemetzkes of Batteri-e. Mer köss doe sojar en Himm, en Blüske on dann on wann och all ens enne BH koope. Mar et schönste es, dat mer op'm Oedingsche Maat och all ens Oedingsche Töen höre deet. Et wörd jo emmer seldener, mar en paar Oedingsche könne et noch.
Manes es kinne Oedingschse van Jeburt, hä es Ostpreussen-Oedinger, dä en all die die Tied dat eene of angerte Wooed en Platt jelierd hät on et och döckser sprekt. Mar Liesa, wat däm sin Frau es, dat es en Oedingsch Mädche, die Platt kann. Met bedds donn ech mech jäer ongerhalde.
Vörrije Samsdag stong Manes wie enne Fels en de Brandung an de twedde Reih. "Jong", sait hä, "nau ben ech bloos twee Minüdde laater als Liesa op de Maat jekomme, wäejes dat ech min Auto noch parke moss, wat hei jo en Problem es. On nau kann ech se partout net fenge." "Jewess", wesselde ech, ""dat es so, als wenn dä Maat die Frolütt verschlucke deng." "Och", sait Manes janz drüsch, "wör ech nau em Orient, dann wör dat so: Frau weg, mar dann haie ech wennistens drei Kamele doför jekreije."
Dreemol bön ech bee Manes langes jekomme. Hä hatt sin Liesa emmer noch net jefonge. Eesch bee de vierde Runde stonge die twee wier tesaame. "Ech sait för Liesa: "Du häss dinne Mann äwer fies lang waade looete. Et bäes wör, wenn mer enne Treff uutkieke deet." "Wie Treff uutkieke", mulde Liesa, "dat Kamel hai mar ens de Ooge opmake solle."

^ Zur Übersicht

Twee Rhienkadette stonge op de Oedingsche Maat on keeke en de Loff! Hütt soll wahl kin Schepp mehr komme. Fierowend. Do kooem enne fiene Häer direktemang op denne tu. Wat wor dä vörnehm: Blaue Nadelstriepe, roode Fleesch op et sie-e Himm, schwatte Casch- misch-Mankel, Kalabreser, witte Schal on Hänsches, en jolde Kettsche öm d'r Hals on Paföm onger de Hornbrell. Hä musterde die twee Kadette van boowe bes onge on van onge bes boove. "Können Sie mir sagen, wie ich zum Rhein komme?"
Die twee luurde sech kött aan, keeke op de Äed, nau no de Kerktoorel on saite nix on dat janz lang. Dä Jentlemenn frogde noch ens janz fröndlich: "Haben Sie mich nicht verstanden? Wie komme ich zum Rhein?" Hä hai jraad so jood jäeje en Wangk spräeke könne. Tröet trock enne Flachmann ut de Täsch on nippde draan. Dä Koopere stoppde sech en Pief. Sons nix, kinne Ton! "Dä Jentlemenn versöckde et op Englisch: "Please show me the shortest way to the Rhine?" Nau nippde dä Koopere an dä Flachmann, on Tröet stoppde sech en Pief. Dä fiene Häer versöckde et op Französich. Nix. Op Spanisch. Nix. Op Türkisch. Nix! Nau word dä Jentlemen quood on reep fuchtij: "Nu wieet ech Beschieed, Ihr sitt te domm för mech te sägge, wie esch noe de Rhieen louepe mott? Ech häb jenoch van ösch Fulke!" On dann trock hä den Dyk av. Hä jeng sojar en de richtije Richtung.
"Dat wor äwer enne verdölld fiene Krewelsche! Hässe dat jehöed wievöll fremde Sprooeke dat schlaue Kerlsche koss. Dä hätt os jeweß och op polnisch on russisch jefrogd." "Jo, jo, wesselde dä Koopere, met sovöll Sprooeke on Krewelsch Platt es dat jewess enne klocke Buck. Mar sin ens ehrlich, hätt öhm dat wat jenötzd?"

^ Zur Übersicht

En de Rejel kammer jedden Dag em Schluffekino en Talk-Show = spräek Tooek Schau sehn. En son Tooek Schau treffe sech Jodd on de Weld. Nä, Jodd net. De Welt och net, noch net ens de Halv-Welt. Mar Politiker on angere Bonze schwaade on sage döcks nix.Nau wor doe en Schau-Masterin, die hatt enns den Düwel enjelaade. Se deng för dese Tooek präpariere. Se schreew ehr Froge op. Eeschd wollde se den Düwel froge, wie et dann en de Höll uutsöj. On wat von Lütt do wöre. Dat wöre doch jewess son Lütt, die jett op't Kervholt haie. On wä hät janix drop? Die mösse dann em Heemel sien. Dann wollde se froge, wat för den Düwel jood on wat schleiht wör. Se deng ehm och dodrop aanspräeke, dat hä jo eijentlich och enne Engel wör, wenn och bloss enne jefallene.
Dann wollde se von öhm weete, of hä velleits Spione em Hemmel haie on op dat ömjekehrt och möjelich wör. Of et net doch en Kommunikazion möt den Häerrjodd jöw. Dann wöss se jäer, off et en de Höll en politisch System wör. Of Hitler, Stalin of dä Saddam en de Höll wat uutrechte könnde. Kösse Terroriste,die sech för enne Platz em Heemel en de Loff sprenge denge och de Höll unseeker maake? On wat wör möt dä Dabbelju Busch wenn dä ens de Läepel avjäewe möss. Wör dat enne Kandidat för den Heemel, wäejess dat dä so fromm wör of möss dä en de Höll schmoore, wäejes dat dä edoch janz völl Blood an sin Fengerkes hai.
Etletz wollde se den Düwel unbedingt froge, off dä, dä eemol en de Höll wör, do för de Ewijkeet dren bliewe möss. Odder of en "Austauschprogramm" tösche Heemel on Höll prakkesierd wörd. Etletzt wollde se weete, of die, die sich en de Höll net benäme kösse, op de Welt teröckkehre mösse. On wenn, als wat?

^ Zur Übersicht

Oeding es all älder als wie duusend Johr. Onger dä Naam "Urdingi" hant velleits en Hangkvoll Hüskes do jestange, wo hütt de Rhien es. So en de Höh van't Rhienschlößke on de Zollhoff. Dä Äezbischof van Kölle, Konrad van Hochstaden, deng 1255 die paar Hüeser för en Stadt erkläre. Bloos dä Rhien meek nau fiese Querele on sadde Hüeser, Kerk on Kerkhoff döcks onger Water. Jeddes Johr dä sälwe Oosel. Dat wor dä neue Äezbischof, Siegfried von Westerburg, leed on hä deng die Stadt en bettsche wieder op Kreweld aan verläeje. Dä nächste Äezbischoff, dä Heinrich von Virneburg leet en staatse Muur öm die paar Stroote trecke. En't Städtsche erren kooeme mer bloos duur en paar Pooerte.
Henger de neue Muure hatt nau all enne Börjermeester et Saage. On dä wollde för sin Städtsche partout enne jerejelde Naam hann. Priesuutschriewe kannde mer damals noch net. Die paar Schepper van´t Städtsche, die Holt, Möhlsteen, Salt on Wien rannschleppde, hadde och nix op de Pann. Dä Börjermeester daiht an "Volksbefragung". On so sadde hä sech op sin Päed on ritt von de Nierpooert öwer de Nierstrooet on de Owerstrooet noe de Owerpooert. On dann wier teröck. On jus an Tuffsteenkapellke, wo hütt Zint Pitter steht, kooem en ald Mütterke on leep d'r Börjermeester jenau för et Päed. Dä feng nau enne Vertell met dat Fräuke aan. On dobee frogde hä janz stikum: "Nau, sagd ens, Frau Nöttsches, wie soll oser Städtsche nau heete? Ech soek enne schöne Naam!" De Aal wor totatal verschreckd. Wat hat se domet te dohnn? Nix, reen ja nix. On se sait janz höeschkes:" Enne Naam för os Städtsche? Dat es äwer ür Denge!" "Jenau, dat es et", reep de Börjermeester, so soll et sien. Uerdingen, dat es dä Naam on dä soll emmer bliewe!"

^ Zur Übersicht

"An't Jold hängt, no et Jold drängt min Häz" dat leet dä alde Joethe sin Jritsche all saage. Mar för dat Kengk wor et de Verdärw. Och de völle Joldjräewers en Amerika on Afrika send net jlöcklich jewode, velleits dä eene of angere wat riek. Mar dat wor et och. On nihildesdotrotzquam send de Lütt fies schäerp op et Jold. Wenn hütt em Blättsche stöng, dat ongerm Ejelsbersch of onger de Müllkipp Jold te fenge wör, dann kaweer ech doför, dat völl Krewelsche em Joldrausch wöre. Schöppe on Spetzhacke wöre dann Mangelware. So wor dat vör langer, langer Tied en Oeding och. All de Oedingsche wore fies em Joldfieber.
Wenn Oeding noch en eeje Jericht on och ne eejene Knast hatt - dä wor en de nau all lang avjereetene Owerpooert - do vertellde enne Penner, dä en Henn jeklaut hadde on wäejes dat verknackst worde wor, dat hä et uut de Rahm van sin Zell jenäuekes jesehnn hai, als wie witte Jestalte öm de Mariesüll erömjejeistert wöre. Enne van die Jeester hai emmer jeroope: "Haie mer mar noch dat Jold, wat mer hei verjraawe hant." Sinne Wärter frogde noch: "Bösse janz seeker?" On wenn dä Penner wesselde: "Jo, jemaak", do meek dä Wärter Meldung an sinne Bass em Stadthuus. Nau wosse et all twee, dat en de Nöh van de Pooert on de Mariesüll enne Joldschatz verjraawe wör. On wie dat so es em Läewe. Die twee kosse et net för sech behalde on noch kin Wäek laater, woss et fass jedder em Städsche.
Flöcks word enne sojenennde Schatzjräbervereen jejründet on onger de Aufsicht van de Polizee of net word vör de Owerpooert on rongk öm de Mariesüll jejrawe. Nau mott mer weete, dat et en des Tied noch kinne Bagger joow. On Löeker van fönf meters deep te jraawe, dat jeng fies en de Knöek. On et wor jo net bloos fönf meter deep. En dat Looek hai mer drei Ohße bejraawe könne. On jeddes Mol, wenn se met de Schöpp op wat Hattes stoote denge, dann kreije se jroote Ooge on denge vör Freud kriesche. Mar dat, wat de Jräewers jefonge hant, wore bloos: alde Balke, dicke Steen, roode Ziejel on sojar en paar Knöek, mar bloos kin Jold. Die Ärm worde emmer länger.

Dat Jold, dat vor langer Tied verjraawene Jold, heel die Oedingsche op Trapp. Dag on och Naiht word jebuddeld. Rongk öm de Mariesüll wore deepe Löeker on Jräew hoopwies. An eene Owend, so vertellt et os dä alde Hub Weyers sellich, wore de Joldjräwers en son Looek wier op wat Hattes jestoote. "Plum, plum" meek et, wenn die Schöpp op dat neue, unbekennde Hatte trooef. On dann hant de Joldjräewer jans höeschkes en ronge Saak freejeschuffelt on no booewe jebüerd. Et wor en kleen, mar schwor Holtfätsche met rostijee Ieserbäng dröm. Och hong völl Lehm on Dreck draan. Dat kammer sech wahl denke. Janz vörsichtich hooewe se dat Faat op en Schörskaar on schooewe et no de Braueree Schmitz op de Owerstrooet. Do kooem dat Faat eesch onger de Pomp on dann stellde se et medde en de Braustoow op enne Dösch. Dä Braubaas joew Runde: "Wat mag wahl en dat Fätsche dren sin? Solle mer et eesch ens wieje, dann kann ech velleits all rooene, wievöll Jold dodren es." "Nix wieje", reep enne Nasewies, "lott dat Faat opmaake on die Joldstöckskes on Daler telle. Dann weete mer et jenau." Hub frogde en bettsche domm: "Wie krieje mer dat Fat dann op?" "Do jecke Stitz," tudde Wellem on eh sech die angere verkeeke, hatt hä sin Spitzhack all öwer de Kopp on hässe net wat kannste haude hä met Schmackes op de Booem von dat Faat. Mar wat nau uut dat Faat spritzde wor alles angere als Jold. Booem, Möebels on de Kle-er van de Joldsöekers wore volljesprizd met dat flüssije Jold van en Oedingsch Brellehüske. No wor et uut met telle, do wor bloos wat te ruuke. Et stonk erbärmlich, akkerat so, als of dä Schönwassich - dat wor dä Oedingsche Klante Tött - jraad en Kull leer jepompt hai. Von wat von Hüske wor net ruuttekrieje.
Die näxde Wäek bleew de Brauerreistoow jeschlooete. Met völl schwatte Seep on Sangk hant de Frolüüt dagelang jeschrubbd on jeputzd.
Met et Joldjraawe wor et van dä Dag aan vorbee. Wenn mar bloos dat fiese Lache net jewess wör. All de Joldjräwers on die, die op dat Jold sons noch schärp wore, bleew nau nix angesch mehr öwrich als wie domm te kieke on ärm te stärwe.

^ Zur Übersicht

Twee alde Jüfferkes hadde en de sibbende Etage van dat jroote Hochhuus en schöne, jroote Wohnes. Liesa,de Äldere, hat op de Weihnachtsfeier en janz jonge Jaas jewonne, die noch putzlebendig wor. Wat nu? Zöff, de Jöngere, wor fies am muule: “Wat solle mer möt dat Dier?“ Mar Liesa sait: „Woför hant mer en Jästezemmer? Doe soll die Jaas wahl schlooepe könne. Die fuure mer fett on dann hannt mer en jute Jabe Jottes! Mar vertell nömmes van osere Untermieter, die Lütt kösse dann scheel kieke!“ Die Jaas döppde se Berta. Die kreij nau en Kau on enne Back em Jästezemmer on deng sech möt de Tied an dä Jeruch van die twee Jüfferkes jewähne. Die Jaas word fetter on fetter on nau solde jeschlachtet wäde. Die twee knobelde on Liesa sollde die Jaas nau schlachte on Zöff ruppe. Berta schnatterte wat se koss. Mar Liesa holde dat jroote Metz on wäejes dat Zöff kin Blood sehnn koss, jeng die derweil en de Stadt. Wenn se terück wor, log die Jaas all op den Köekedösch. Dä Kopp heng schlapp erronger on pendelde hin on her. „Mer sütt nett eene Drop Blood“, schluchzde Zöff. Doe sait Liesa: „Ech koss et möt et Metz net donn. Ech hann der en Hängke voll van din Schlooeptablette jefuhrt. Se es jans friedlich enjeschlooepe. On nau bös du draan. Kiek dat du dat Dier jeruppt kriss.“ Zöff nohm sech die noch wärme Jaas on feng aan die te ruppe: „ Mar uutnähme motts du die. Du wetts, ech kann kin Blood sehnn.“ Wäejes dat et all laat wor, wollde Liesa dat eesch am näxde Morje donn. Die twee hadde en onruhije Naiht. Mar angerten Morje worde se all früsch jeweckd. Die Jaas wor putzmunter. Et wor en Beld för die Jötter. Die näcke Jaas on de twee Jüfferkes, die dat net bejrieepe kosse. Die Jaas kooem nie en de Pott. Op dat die net friere sollt, hadde Liesa on Zöff der flöcks en jäeel Pullöwerke jestreckd on als Ersatz sojaar noch en knallrood.On wenn se net jestorwe send, dann läewe se hütt noch. Köb uut Oeding

^ Zur Übersicht

En paar Diere denge öwer et Chressfess debattiere. Jedder sollde doch
ens sage, wat dodraan et Bäes wör. "Do hann ech kinne Örschel", sait
dä Fohs direktemang, "wat wör Chressmess ohne en jood jebrooene Jaas.
Dat wör et vör mech!" "Du denks och mar bloos an Äete ", wesselde dä
Iesbär, "als wenn et sons nix jöew. Ech deng mech wönsche, dat et völl
schneie deet." Bloos net so völl Schnee", knaatschde dat alde Reh,
"enne schöne Tanneboom möt Lametta, on roode Kujele, dat wör wat."
"Mar, doe dörwe bloos net sovöll Käze dren sien," hülde de Üll, "hütt
es et fass öwerall daghell van all die lektrische Käeze. Ech hann et
am lewste jett düster." Dä Pfau sait: "Nä, et dörw net so düster sien,
dann sütt jo nömmes min neu Kleed. On wenn et Chresskenk mech kinn neu
Kleed brengt, dann es dat för mech kin Fess." "Neue Kleer bruuk ech
net", krächzde de Elster, "ech well Chressfess neue Klunker sehn. Mar
all bloos möt Brillijante." Do brommde Meester Petz: "Möt Kleer on
Klunker kann ech nix aanfange. De Haupsaak för mech wör jenoch Läwkock
on Prente. Ohne dat, kinn Chressfess." "Maakt et wie ech", reep do dä
Dachs, "För mech alleen tellt bloos penne, penne penne. Dröm hett
Chressmes för mech: Ens penne dörwe, solang ech well." "Verjäet
vörher et Suupe net", mennde noch dä Oohs, "op die Fessdag en jroot
Faat Bier on en Fläsch Schabau dobee on dann penne!" Mar doe
kreischde hä laut AUA: "Du Äsel, watt fällt dech en, woröm tritts de
mech vör de Küete? Do wesselde dä Äsel: "Du fiese Oohs, denkste Du
dann ja net an dat Kenk?" Doe deng dä Oohs sech jett schaame: "Du häs
reiht, dat Kengk, jaja dat Kengk, dat es wahl de Haupsaak!" Do
wisperde die Kerkemuus: "Wat ment ehr, weete dat ejentlich de Mensche
noch?"

^ Zur Übersicht

Liesa on Fine wore en de Schönheitsfarm em Alljäu.
Net, dat se dat nöddig jehatt hai, mar se woldde ens jet för sech donn,
Orlaub vande Ehe, Urlaub vanŽt Büro, Urlaub van de Npbbere effe Urlaub mar bloos för sech.
Jesichtsmaske, Joja, Massage op de Buck on op de Röck-
Sech möt de buck op de Röck läje, ohne dat jömmes watt sätt.
Kört vör et leckere Owesäete noch schnell en Fahrrad Türke.
Ongerwäeje sohe se twee Jüfferkes op de Bank sette.
Em Vorbefahre en frondlich Jrüß Jott on dann von henge:
" Hallo Krefeld". Wat vör Öwerrschung.
Die twee Jöfferkes wore Traud omStina uut Krefeld.
joode Bekännde uut de Saunaclub. Dat wor een Hallo on Hali
dann soete vier Jöfferkes op die Bank on fenge aan te schwadroniere. Vor sech hadde se en jroote Wei,
möt wennistens twentisch bruunjescheckde Küh,
die frieflich am jraase on am wierankäe wore.
Doe sait Fine: Die Beester möss mer eijentlich avschaffe .
För de Klimaschutz. Die puupe sövöll Methan en de Loff
wie hongededuusend Dieslautos. Nä. nä sät Stina.
Lott die Küh mar puupe. Örjenwann maake se van denne ehr Methan Enerjie. Loff van de Küh för de Steckdoos.
"Liesa mennde: "Do solle sech die Öedingsche mar en Beispiel draan nähme. Statt Kohekraftwerk för Bayer, en Methananlaag van Trianell. Fine wollde nau weete, off den Driet van die Küh och tejebruuke wör.
"Jewess", sat Traud, "domet stoeke die Buure hei all lang.
Öwrijens, soll de Kuhdriet och en joot Meddel för lahme Knöek sien.
Ferkes on och Höng suhle sech em Kuhried.
Do wor Stina flöck op de Been. "Wo es mine Struppi?"
Struppi wor dat Schoothönke van Stina. Enne Yorkshire.
Strupiii! Struuuupiii" Nau wor Struppi wahl kinne Jubliäumshong,
der eesch bee et 25.moel Roope noe Frausche kooem.
Wenn alle vier Weeter et driddemoel Struppi reepe,
kom dä ankawibbeld. Dat sollde Struppi sien.
An dä Hongk wor net een Höerke te sehnn.
Struppi wollde wahl de Heilkraft vam Kuhdriet uutprobiere.
Hä wor enn Kuhfladen op vier Been. Wat nu?
Stina probierde et möt Jraasbüschel, dann mit Pestwurzbläer.
Mar nix holp. Struppi stonk bestialich drei Meilen jäeje de Wenk
Vor laute Oosel hollde Stina
dä schneewitte Bademankel uut ehr Auto on
dodrenn worde Struppi enjewickeld.
"So kann mer den nich ins Auto lassen. Minne Owend es jerettet.
Ech mott Struppi bade."
Wenn Liesa on Fiene wier op de Schönheitsfarm aanfuhre, frogde Fine:" Wenn demnäx Methan uut de Steckdoos kömmt,
stenkt dat dann so als wie Struppi?

^ Zur Übersicht

Wat schenkt mer en Tant, die all alles hätt? Dat es jeddes Johr et selwe, wenn ech bee ehr op de Namensdag enjelaade ben. On wat schenke, dat mot sinn, wäjes dat Tant' Jettsche die Ärvtant es.
Blömkes well se net. Do kann se sojaar jeftij wäede: "Do wedst doch, dat ech jäeje Plante allegrisch ben." Schnöbbes jeht och net, wäjes dä Cholestrin. För Sammeltasse es kinne Platz mehr em Kaas. Op "CDs" of sowat hät se kinne Treck, op dat se net mehr jood höere kann. On Böcker well se all janet, do hätt die all een. Dä Wellensittich von vörris Johr wor all no zwei Dag fleeje jejange.
Mar woför jöwt et dann Jeschenkbutikke? Die nette Buttikerin hatt do jar kinne Örschel: "Da finden wir schon was für Ihre liebe Tante! Zum Beispiel einen "Belly Button Warmer aus Skeepskin? A present for the lady, who has everything!" "Wat es dat dann?" well ech weete. Näe, dat wor och nix. Ech kann min Tant doch kinne Buknabelswärmer schenke.
Mar ech ben min Jeld noch quitt jeworde. Se hät mech en "Biologisches Kräuterkissen" anjeklappt. "Thymian, Rosmarin, Lavendel, Minze, Melisse, Kamille, Anis, alles biologisch! Da hat Ihre Tante einen sehr guten Schlaf!" Dat janze wor als wie en kleen Koppkesse so jroot on meek alleen von de Verpackung all wat her. Et wor wir en schöne Fier. Ech wor King! Ech hatt dat richtije Metbrengsel. Ech dorfde et en't Schloppzemmer brenge on op et Paradekesse leeje. Dat wor för drei Weeke.
Jiester reep Tante Jettsche mech aan: "Wat hässe mech do von ne Stenkbüddel jeschenkt. Dat es ja schlemm. Ech selws kann et jo net mehr so jood ruuke, mar Billa hät jesait: "Das riecht hier ja wie ein Komposthaufen!" Ech wor vom Spräeke av. Bah, wat es Billa förn Fimmelsnaas!

^ Zur Übersicht

Nau wooehn ech al fonf onsässich Johr en Oeding. Jewess kooem ech en des Tied eemol en de Week en de Stadt. Ech bön al, saare mer enns, so dreidusend Mol öwer de alde Kreweldsche Strooet am Brempter Hoff vorbee jejange, öwer de Neer- on Owerstroot jeloope, an de Rhienpoort vorbee öwer de Rhiendamm jestalpt on - han nix jesehnn.
Mar nau hät mech en Faltbättsche ens jewiese, dat mer sech os Oeding ens dur de historische Brell aankieke soll. Dat Blättsche wor op de Mess van enne nette Doktor vam Kreweldsche Planungsamt jewahße. Dä hatt klor on deutlich enns opjeschreewe, wat mer sech in Oeding so all enns aankieke köss on möss. Hä hät dat Blättsche jenennd: "Uerdingen-Historischer Stadt Rundgang."(kritt mer em Heimatbund)
En Oeding stonnt Hüeser, die all fönfhongert Johr do stonnt, enne janze Hoop so tösche tweehongert on dreehongert Johr. Do kannste Jotik, Renaissance on Barock bewongere. Sojar de Ruute van Nibbeling, die en de fiffzijer Johre met jroote ronge Schiewe an de Ecke neu enjebaut worde, solle all historisch sien. Wie koss ech all die Johre so blengk sin. Janz besongesch sehnn ech nau dä alde Maat on dat alde Stadthuus, de Herberts-Hüüeser möt janz angere Ooge. Et deng mech noch bäeter jefalle, wenn doe kinn Autos römstönge. Och dat Klöske op de Owerstrooet wöd för mech emmer wertvoller, wenn ech och net bejriepe kann, dat de Stadt Kreweld et verscherbelt hät.
Letzde Sonndag nohm ech min Enkelkenkg möt op de historische Rötsch. "Opa, was ist denn hier alles historisch? "Ech wesselde: "All dat, wat en dä Plan hei steht, wat mer em Heimatbund för enne Mark koope kann!" Nä. sait Oma: "Historisches Uerdingen hett so völl wie Oeding blievt Oeding!"
"Jo jemaak!"

^ Zur Übersicht

Wenn ech jet lie-e kann wie Buckping, dann send dat Motorräer. Dat send die Denger, wo son drop sette, die et en de Häng hant. Wenn die domet et Jas opdrehe, dann jöw dat Krach. "Oouuuu-uuuu!" Mar dat es et net alleen. Et jöw noch angere Saakes, die mech bee de Motorräer opreeje. Oft jöcke die em Rudel. Wenn de Jlöck häs, een henger et angere. Mar wenn de Strooete wat enger send, dann fahre die och all ens te Dritt näeweenanger. Of, do jöcks met din Äuteke met hongedfuffzich Saakes öwer de Autobahn. Nau höes do lenks van dech: "Oouuu-uuuu" on met zweihonged Saakes flitze son Schwatte an dech langes on bieje janz nau elejant noe reihts exakt vör din Lenkrad. Of, do stehs em Stau. Mar, je länger dä Stau, öm so mehr Motorräer quetsche sech medde duur, so als wenn se de Rettungswage wöre. Motorräer stelle sech döckser och op de Parkplatz quer. On wenn die wier wegfahre: "Oouuuu-uuu!"
Pitter vertellde en Mäuzke, wat hä met eejene Ooge jesehnn hann wolld: enne Brummifahrer deng sech en de Raststell op de Autobahn reste. Hä bestellde sech en Päckske Zerette, en Känneke Kaffe on en Stöckske Sahnekock. Dree Boesch, janz en schwatt Läer, stieje van ehr Motorräer on denge sech direktemang met an de Dösch van de Brummifahrer sette. Eene van denne schnappde sech die Zerette on stooek die en sin Täsch, dä twedde dronk sech dä Kaffe on dä dredde jrapschde sech dä Kock. Dä Brummifahrer sait nix, betahlde, wat hä bestelld hatt, on jeng. "Mann, ist das eine Niete!" sait eene van die dree onjerejelde Pänze on die twee angere lachde domm.
"Ja, Ja," sait die Kellnerin, die de Dösch avrümmde, "als LKW-Fahrer ist der auch eine totale Niete, gerade hat der doch glatt drei Motorräder plattgewalzt!"

^ Zur Übersicht

Wä kennt net dat Märche van dat Döschke, wat sech op Order van selws deckt? Honger? Nie mehr. Dann noch dä Äesel, uut dem sin Pöeke emmer dann Joldstöckskes feele, wemmer reep: "Bricklebrit". Dä Clou van dat Janze es dä Knöppel, dä jeddem an et Fell jeht, wemmer röpt: "Knöppel uut dä Sack." Ech stell mech nau ens vör, ech köss öwer die drei Wongerwaffe alleen bestemme.
No köss son Döschke völl Joo:es donn. Enne Düsejet möss et van Langk to Langk brenge, wo de Blaare vor Kohldamp dicke Bück krieje on dann stärwe mödde. Met dä Äesel hai ech all mehr Örschel, wo dä hinkacke sollde. Wäejes dat dä Düewel dat emmer op de jröttste Hoop deet. Mar de "Langzeitarbeitslose" on och dä Penner en oser riek Langk deng ech wat Jold op et Treppke läeje, wäjes dat die dann och ens Pännekefett läewe kösse. Velleits leet ech dem och eemol no dä Spar-Eichel. Mar bloos eemol, domet dä uut et jröwste ruutköem.
Bloos met dä Knöppel em Sack hai ech et verdölld schwor. Jäeje Jewehre of sojar Atombombe köem hä net aan. Do möss ech mech enne Trick enfalle loote. Te:eesch leet ech dem op de Uno-Vollversammlung dotösche haue. Dann deng ech noe dä nächste Nato-Jipfel düese. Do leet ech dä Knöppel net ehr en de Sack, bes die all schwöre denge, ehr "Potential" enteroste. Nau haude ech dä Dabbelju Bush de Hucke voll on och dä Blair. Ech leet alle Jenerale en eene Sack stecke. Minne Knöppel hai kinne Tied för te räste. Emmer drop on noch ens drop, als bes dat die Freene halde. Mar ech han Ängs, dat minne Knöppel bee sovöll Klöpperee ens duurbräeke köss, eh die all opjehörd hant, Mensche te verpolvere.
Knöes, ech han sonne Knöppel net. Döschke on Äesel brugde ech dann net.

^ Zur Übersicht

Dat Märche van't Rotkäppche kennt jewess jeddes Kengk. Dat es en bekennd Märche van die Grimms-Brö-er. Omas on Opas solle et ehr Enkelkenger wahl döckser vertelle. Mar se mödde nau fies oppasse, dat se net hei die Version vertelle:
Rotkäppche sollde ehr Jrooß en lecker Fläschke Wien on enne selvsjebackene Kock brenge. "Dat du mech bloos op de reihte Wäech bliwst", sait die Moder. "Jewess, jewess," wesselde Rotkäppche, "et soll mech wahl nix passeere." Mar se hadde net met dä fiese Wolf jeräekend. Dä leep et Rotkäppche öwer de Wäech on sait finnisch: "Kiek ens doe die bongke Blömkes, din Jrooß deng sech öwer en Strückske jewess ärj freue." Dat leet sech dat Weet net tweemol saage. On wenn et dann en Stond laater bee de Jrooß vör't Bett stong, deng et sech jett wongere.
Nau kooeme die Spröckskes van die jroote Ooge, de jroote Horschläepels on van die jroote Mull. Schnapp, schnapp, ham ham, on flöcks wor Rotkäppche en de dicke Buck van dä Wolf, wo se nau och ehr Jroßmoder wier fong. Dä Wolf soll sojar noch dä Kock on de Wien verkasematuckelt hann. Nau legde hä sech met sinne dicke Buck op de Röck on wor rubbeldekatz fies am schnarche. Dat jeng solang jood, als bes dat dä Jäejer dat höede, däm de Buck opschnie-e deng on schwooere Wackersteen dodren deude. Als Jrooß- on Rotkäppche-Ersatz .
Wenn die Jrooß on dat Rotkäppche tesaame met dä brave Jäejer de Wiederjeburt fierde, sait die Jrooß: "Kengk, dat soll dech wahl en Liehr jewess sien. Kleen Blage mödde emmer brav sien on op de reihte Wäech bliewe, sons jeht et denne so als wie dech. Sonne fiese Wolf es hütt öwerall am luure." Mar Rotkäppche wesselde: "Jewess, Oma, jewess, mar denk du selws emmer draan: te-eesch wörd die Jrooß opjefräete!

^ Zur Übersicht

Hütt fängt dä Mond an, dä mäkt, wat hä will. Mar et jöw och hütt noch Lütt, die met angere de Jeck maake on die en de April schecke! Vör Johre on Dag wor dat en Oeding ens so:
Jüppke, enne bekennde oedingsche Friseurmeester, sait am eeschde April för sinne Stift: "Drickes, hei hässe en Jurkejlaas. Wäjes dat osere Joldfesch endlich Junge krieje mott, jehste domet no de "Rheinlust" on frochst dä Baas, dat dä dech dä Deckfesch uutlehne deet. Domet kömmste mech flöcks teröck. On, dat Do mech dat Jlaas janz, janz vörsechtich drage deest!"
Drickes stong en de Rheinlust on frochde noe de Deckfesch för de Joldfesch van sinne Meester. Dä Weet koss sech et Lache kaum verkniepe. Dann sait hä janz drüsch: "Jong, dat deet mech äwer leed. Dä Deckfesch hann ech jraad jiester morje no de "Blaue Hahn" op de Neerstroot jebrait. Bestell dä Will Kamman 'ne Jruß van mech, hä soll Dech dat Feschke jäewe " Em "Blaue Hahn" stong Frau Kamman henger de Theek on hörde sech an, wat dat Jöngke wollde. "Will, hei well jömmes dä Deckfesch van de Rheinlust lehne." "Näe" reep Will, dat jeht net. Dä Fesch es seit van morje all bee Fuhrmann."
Drickes jeng no Fuhrmanns on sait sinn Sprökske. Dä alde Schuster frochde janz fröndlech, wä dann dä Meester wör. Dann jeng hä met Drickes no sin jroot Aquarium. Do wore hongert so jood als wee eene Fesch dren. "Et deet mech leed, Jong. Ech kann dä Deckfesch nau net ruutnähme. Am beste es, do löpps no dinne Meester on brings däm sinne Joldfesch hei her. Dann kieke mer wier!" Dä Stift hollde dä Joldfesch. Paul schmeet däm en sin Aquarium on sait: " Näx Johr, am eeschde April, kannste dä Fesch wier avhoole. Dann soll hä wall Jonge krieje." On nau jeng dat Böerschke en Latäer op! April, April!

^ Zur Übersicht

De Stadtwerke kösse stolt op Fläppkes sinn, wenn se dat kösse. Lieske on Pitter Fläppkes send Jroßkunde.
De Köek es janz elektrisch: Herd met vier Plaate, Backoowe on Jrill, Mikrowelle, Spöelmaschien, Ijsschrank, Jefreerschrank, Kaffeemaschien, Appelsinepress, en Eierkookjerät, Mixer, Toaster on sojar en elektrisch Metz on wat weet ech noch wat.
Em Bad twee Durchlauferhitzer för et wärme Water, en Maschien för te wäsche on en für de Saakes te drüeje on an de Deck en paar dicke Strahlers. Sojar et Tängputze on et Rasiere jeht elektrisch. En de joode Stoov es mar bloß enne Fernseher met Videorekorder, en paar "Hifi"-Jeräte met allem Dröm on dran, drei Stehlämpkes on sibbe Deckestrahlers. Dä twedde Fernseher steht em Jästezemmer, wo Lieske och et Büjelieser on Pitter sinne Computer loope leet.
Em Schloppzemmer löppt net sovöll: op jeddes Nachtskonsöelsche eene Radiowecker, en Lämpke för te läese on an de Deck en Infrarot- on UV-Jerät för öwerall bruun te wäede. En all de Kaamere stonnt Loffbefeuchter, selws de Fußbodenheizung es elektrisch. För de janze Wohnes reen te halde, hannt Fläppkes twee jroote Hüelbessens on noch en lektrische Bohnermaschin extra.
Eemol em Johr krieje se van de Stadtwerke en Breffke on dann weete se, wievöll Kilowatts se exakt verpolvert hant. Booer!
Fläppkes looere em Bedd. Lieske op en lektrisch Heizkesse, Pitter koss sech de Matraz met en Motöerke verstelle. Lieske kneppsde ehr Konsoolelämpke ut: "Nacht Pitter" - "Schloop jood, Lieske" "Sag ens, Pitter" jähnde Lieske, "wie es dat met dat lektrische? Wo es nu dat Leet von min Lämpke nau avjebleewe?" "Jo" sett dä Pitter för sin Frau "jangk mar ens en de Köek on maak ens dä Iesschrank op, do fengste et jewess wier!"

^ Zur Übersicht

Jeneratione-Probleme en de Lektrisch. Dat jöwt et! Vörrije Wäek en Linie 3: Pitter on Lieske wore en Oeding am Röttsche enjestieje: "Zweimal Hauptbahnhof!" Dann höede ech Pitter bromele: "Ech wolld die Bahn net koope. För dä Pries hai mer jo bald met et Taxe fahre könne." Hä stellde sinn twee dicke Koffer en de middelste Plattform van de Waarel av on sadde sech op de nächste free-e Platz.
An de Haldestell bee de Ter-Meer-Scholl word die Lektrisch voller. Scholl wor ut. Böerschkes, wo mer noch net ens Lällbecks för saare koss, meeke sech fies breet. "Darf ich mich auf Ihren Koffer setzen?" frochde sonne Flieres on sooet all met sin Föttsche medden drop. "Mäkse dat do van de Koffer kömmst!" mullde Lieske. "Warum? Sind da Eier drin? wesselde dat Börschke! Pitter hai dem Flieres am lewste en Watsch jejaewe. Dat Böerschke konnde wahl Jedanke läese on sait: "Kommen Sie mal in mein Alter, dann setzt es aber was ab." Pitter schluckde. Wat sollde hä och angesch maake. Angere Blaare spelde "Bäumchen, Bäumchen, verwechsel dich." Jong, do wor Läewe en die Lektisch.
Mer Alde keeke mar stur no buute. Mar bloos net opfalle. An de Bockumer Kerk word die Bahn pickepackevoll. En paar Mütterkes fonge kinne Platz mehr. Pitter meek sinne Platz free. Hä sait janz laut:" "Darf ich Ihnen meinen Platz anbieten?" Die Blaarestörde dat net, se bleewe all sette.Twee Mädsche nohme sojar vier Plätz en möt de Pöet booewedrop. En Madämeke sait en bettsche spetz: "Das wäre in unserer Jugendzeit nicht passiert."
Mar mer kann öwer oser Jugend vertelle wat mer well, op de Mongk send die net jefalle. Wie wesselde doch sonne Rotzije: "Wie die Alten sungen, so piepe ist das uns Jungen!"

^ Zur Übersicht

Möngkes Matthes on Jritt send jood kattolisch. Se haie och jraad so jood vanjeelich sin könne of muselmanisch, hinduistisch of hottentottisch. Mar de Aldvördere van Möngkes wore kattolisch on wäejes dat send Mathes on Jritt och all kattolisch jeboore, jenau wie deren eejene on aanjetraude Blage met Enkelkenger wie zem Beespiel Carina.
On so es et net verwongerlich, dat Carina all met twee Johr tesaame met Moder on Vader on de Jroosäldere sonndes en de Elfuhres (Messe) jeht.
Carina versteht dat alles net. Knie-e deet weh, jood sitte kann se op die hatte Bangk och net. Am meeschde kann se noch sehnn, wenn se sech op de Bangk stellt. Alles es för Carina komisch: Dä Onkel am Alter, dä en lang Kleed aan hät, die jröttere Jonges met roode Mäntelkes on met witte Fräckskes drop, die doe dauernd von een Sitt noe de angere römloope. Dä Onkel em Kleed steht dann doe on vertelld en Ewigkeet lang, wovan Carina janix versteht. Wör se mar all wier te Huus on köss met ehr Pöppkes speele. Wenn se dann onger de Bangk kruupe wollde, hat Opa se direktemang bee de Plüm on sadde se wier nier. Och wat de jroote Lütt songe, dat verstong dat kleene Mädsche net. Dat wor janz wat angesch als "alle mein Entchen" of "es geht ein Bibabutzemann"!
En Avwesselung wor et för Carina, wenn Oma se an't Hängke nohm on met ehr noe dä Onkel no vöre jeng. Doe kreij Oma jenau wie all die angere Lütt en "Plätzke" on Carina en Krüzke als Säeje op de Kopp. Se jeng met Oma no de Bangk teröck, mar se deng sech weijere, wier en de Bangk ren te johnn. Se bleew buute vör on heel ehr Hängkes vör de Kopp. "Warum weinste?" frogde Oma. "Ich hab auch Hunger, Oma!" sait Carina.

^ Zur Übersicht

Fläppkes hannt nau all drei Johr enne Hongk, dem sin Ahne fröher enns en Tibet jelävt hannt. Dä hett Bello. Bello es enne nette Hongk. Ech kann bloos erkenne, wat bee dem vöre of henge es, wenn dä met sinn Stäetzke wibbelt. Av on tu jankg ech Fläppkes besöeke. Ech ben dan jewess, dat sech bestemmt eene öwer minne Besök freue deet. Dat es dä Bello. Dä kömmt direktewäjs anjeloope: "Wau, wau wau." so sätt hä mech de Daajestiet. On dann jeht hä net ehr weg , bis ech dem ordendlej jekrabbelt hann.
Bee Fläppkes es Bello de King! Dä hät Bällekes on Pöppkes wie en kleen Kenk. Dä dorf sojar met ennet Bedd. Völl Läckere Saakes krett dat Höngke op sin Tellerke. Mar Moder Fläppkes passd op, da dat Bello sin jood Fijürke behält. Vader Fläppkes es net so streng, van dem kritt Bello sojaar Heinemann-Trüffelkes. Net jedde Dag, dat versteht sech, doför sind die Denger te düer. Bello jeht Dag för Dag an de fresche Loff. Op de Sonn schennt of dat et räejent. Vader Fläppkes sätt:" Wenn ech bee Räejewäer no Huus komm, dann passd min Frau wie den Deiwel op, dat ech mech de Schoh all op den Dörpel uttreck. Bello brugd dat net." Dä hät doch noch net ens Schlüffkes. Stattdesse hannt Fläppkes sech enne jröttere Staubsaujer jejolde.
"Pappa," luurde Moder Fläppkes öwer de Brell, " jank ens effkes no de Jartestadt, Edeka hätt Schappi em Anjebot!" "wat," sait dä Fläppkes, "ech soll nau no de Jartestadt loope, hässe enns no buute jekeeke? Bee dat Wäer scheckt mer jo noch net enns enne Hongk vör de Düer!!"
"Wat hett hä Hongk?" reep sinn Jespons , "von osere Bello hann ech och net jesprooke. Ne, leewe Jong?" Bello kawibbelde met et Stäetzke.

^ Zur Übersicht

Jeht mer hütt öwer de Oedingsche Kirmes op'm Röttge on op'm Maat , dann mott mer all endick Portemonnaie mötnähme . Nau denk ech an die Tied, wenn ech enne Krott van twelw Johr wor. Enne Heiermann van Opa on enne van minne Vader, dat wor min Startkapital. On wat soll ech Ösch vertelle: dat jeng alles hongerneck op en die drei Dag van de Oedingsche Kermes. Mar vör honged Johr wöre son tehn Märkskes fass ein kleen Vermöje jewess.
On jüs van des Tied well ech en Jeschicht vertelle van Pitt, enne Stift em dridde Lehrjohr. Die hann ech en en ald Blättsche jefonge.
Am Kirmes-Samsdesowes hatt dä Meester Pitt noe enne Kunde jeschickt, för 1 Mark 80 te kassiere. Och en des Tied wor en Oeding de Kirmes al samsdes en de Jäng. Pitt hatt die 1.80 em Sack on jeng op Huus aan. Medden op de Maat meek dem son söet Dier van en Scheetbuud aan. Rubeldekatz wor die Mark 8o verschoete. Möt ohne jett te treffe. Wat nu? Pitt deng waade bes et duster word, besorgde sech enne Besen on deng vör dat Huus van sinne Meester de Renn kehre. "Wat soll dat dann?" wollde dä Meester weete. "Ech han dat janze Jeld verlooere on nau bön et am söeke," jriende Pitt. Mar dä Meester on och die Meesterin jlöwde dem Jong kinn Wooed, selws wenn dä sin Täsche van bönne noe buute drehne deng. "Dä Meester word jeck. "Du jehs mech morje net eene Schrett uut et Huus, morje passd du de janze Dag op min Duuwe op. Kirmesjeld es och jestreeke." On so wor et.
Wenn Kirmessonndag die Meesterin nau möt de Blage van de Kirmes noe Huus kooem, wor Pitt jraad de Duuwe am fuure. Do kreij se doch et ärme Dier on jow Pitt twee Mark. "För Kirmesmondag. Mar, dat Du mech nix dä Meester säess." Pitt versprooek et hoch on hellich on deng nau möt de Meestersblage Pinau speele. On do kooem dä Meester noe Huus. Wenn hä soh, wie Pitt so schön möt sin Pute am speele wor, deng öm dat Börschke jett leed. "Ech well dech dat mar ens jlöwe, dat Du min Jeld verlooere häss. Hei hässe twee Mark för morje. Mar nix de Meesterin sage. Es das klooer?" Et wor klooer on Pitt jeng angerten Dag noe de Kirmes on hatt de Welt em Blöske. Sovöll Kirmesjeld hatt hä noch nie jehatt. Möt de letztde Jrosche jeng hä noch ens an de Scheetbuud van Samsdag. Hä schooet bloos eemol on hatt de freie Auswahl. Pitt nohm dä jröttsde Teddy on schenkde däm de Blage vam Meester. On domött hatt hä alles wier jod jemäkd on hä kreij vam Pastuur bee de näxde Bicht och jewess de Absolution!

^ Zur Übersicht

Enne Luurbaas vant Kultusministerium meek en Inpektion en de twelvde Klass van en bekennde Hauptsscholl en Oeding. Dä Schoollmester van des Klasse verklickerde sin Jonges on Mädschels jraad die Jeschicht van Kleist: "Dat zerbrooekene Döppe."
"Stop" sait de Inspektor, "wä van ösch kann mech nau ens exakt verrooene, wat vonne Klant dat Döppe nau kapottjemäkt hät." Kinne Fenger jeng hoch. Do frogge hä direktemang dat Jönkge en de eeschde Bank. "Wä wor et nau? Dat Jöngke feng an te jriene on sait: "Ech wor et jewss net!" Dä Luurbaas schöddelde mar bloos möt de Kopp on frogde nau dä Schollmeester, wat hä van des Antwort halde soll. Dä Schollmester wesselde: "Wenn Fritzke sätt, dat hä dä Krug net kapott jemäkt hätt, dann soll dat wahl stemme. Dä es ehrlich be op de Knöek." Dat wor te völl. Dä Inspektor leep met enne rode Kopp nom Rektor on deng dem stäeke, wat hä en des Klass erlävd hatt. "Mooer" sait dä dä Rektor, "dat es äwer en Denge. On dat an min Scholl. On dann meek hä enne Vörschlag: Et bäes wör, wenn hä en neu Döppe koope deng, dann wör die Saak ut de Weld.
Dä Inspektor kreij enne dicke Hals, mar hä sait nix mehr on fuhr teröck ent Ministerium. Do vertellde hä die Jeschicht sinne Minister. Dä Minister dait direktemang an Pisa on wat de Lütt wahl sage sollde, wenn dat ruut köem. Hä sait, dat hä sech net hai vörstelle könne, dat sojett en oser Langk passiere köss. Wenn dat em Blättsche stöng, dann deng wahl de janze Weld öwer ös lache. Do möss mer os flöcks jett enfalle looete. Hä leep wie en jejesselde Kater dur et Zemmer. Dann packde hä sech oan de Kopp on sait: "Nau hann ech et. Ech kenn dese Rektor. Wenn dä nau dat Döppe all freiwillich betahle well, dann hät dä et och falle looete."

^ Zur Übersicht

En Zettelke looech em Breefkaas: "Liebe Nachbarn, am Wochenende wollen wir feiern. Es kann etwas lauter werden. Wir bitten um Verständnis. gez. Ralf on Tamara." Nau kannde nömmes Tamara on Rolf. Dä eene tipde op die neue Nobbere, die soomers tujetrocke wore, angere mennde, dat wör dä neue Hosbes henge de Tuun ut Latte. "Samsdag owend solle mer et wahl weete. Wemmer net schloope könne, fiere mer met." Dä Samstag owend koom. Op de Kerkhoff hai et net leiser sin könne. Wä wor Ralf on Tamara?
Et Wäer jeng av. Dat hett, et word van Wäek te Wäek wärmer. Schön, owends buute sitte könne. Dä nächste Samsdag jow et näeweaan op de Terass en Fess. Vader on Moder wore en Urlaub. So tehn jonge Lütt denge laabere, lache on dobee Musikk höere. Ech höerde mar bloos: Bum, bum, bumm. De Bäss hadde dat saare. Mar öm tehn Uhr drehden die de Boxe leiser. Dat wor net Ralf on net Tamara.
Dä Samsdag drop bee enne angere Nobber. Do koome so veezich Lütt tesaame. Buute em Jaad. Nau moss die Boxe jäeje dat Jelaaber on Lache van veezich Lütt ankoome. Die denge dat. Bum. Bum. Bum. Et dröhnde on dröhnde. Dur de tu-e Rahme bei 27 Jrad. Mer hant et öwerläwt. Mar,die kemm ech, dat wor och net Ralf on Tamara.
Dann die Wäek, do jing bei de Laubenpiepers de Poss av. Et friedags owend feng et all an. Bum, Bum, Bum. On dann koom de Samsdagnait. Dat wor kin "Bum-Bum". Dat wor Krach met Bass-Verstärkung. Wennistens duusend Watt. Tu-e Rahmes nödzde janix. De Schiewe klirrde. Bes fönf Uhr en de Früsch.. No köss dat jo Ralf on Tamara jewess sin. Mar ech weet et net.
Am nächste heete "Weekend" stell ech min Boxe no buute. On dann lott ech de "kleine Nachtmusik" avloope. Wetten, dat om ellef Uhr all de Polizee bee mech klingelt?

^ Zur Übersicht

Matthes trock hütt för sin Jubiläum sinne Schwatte aan. Fönf- ontwentisch Jöhrkes wor hä bee die jroote Holthandlung all am wirke.
De Kolleje hadde de Buud op fien jebrasselt. Dä Prinzipal wadde all met de joldene Jubiläumsuhr. Nie wörd mehr jeloge als wie bei Jubiläumsrede.
Net so osere Prinzipal. Dä sait, dat Matthes sech eejentlich en all die Johre nie wat hai te Scholde komme loote. Bes op dat Holt, wat Matthes jedde Dag en sin Aktetäsche met no Huus jenohme hai.

"...und ehe ich Ihnen für diese 25 Jahre danke, muß ich Ihnen doch einmal deutlich sagen, daß Sie mir in all den Jahren mindestens einen ganzen Waggon voll Holz geklaut haben!"

Et word trotzdem en schöne Fier. Wenn Matthes en bettsche schicker no Huus kooem, vertellde hä sin Frau, wat dä Chef jesait hatt. "Wat, enne janze Wajong Holt hässe jeklaut? reep Liesa janz opjerecht, "am Samstag jehste mich dat bichte. Holt kläue, dat jöwet doch net!"
Samsdags jeng Matthes bichte: Hä wör jedde Sonndag en de Mess jewess, hä hai och nömmes dood jemekt on em jroote on janze wör hä sin Liesa treu jebleewe.
Mar hä deng ärch bereue, dat hä sinne Chef enne janze Wajong Holt jeklaut hai.

Dä Pastuur hollde deep Loff: "Einen ganzen Waggon Holz hast Du gestohlen?"
"Eja," sait Matthes verbistert, "on mech det dat fies leed."
Dä Pastuur koss et sech net vörstelle. Hä kannde doch sinne Matthes.
Hä deng noch ens froore: "Und was hast Du mit dem ganzen Holz gemacht?"
"Ech hann bloos dä Oowe domet anjemekt," kümmde Matthes.
Dä Pastuur schöddelde sinne Kopp: "Matthes, das hätte ich aber nie von Dir gedacht. Du arbeitest doch in der großen Holzhandlung.
Hättest Du Dir da nicht jeden Abend deine Aktentasche voll Holz mit nach Hause nehmen können?"

^ Zur Übersicht

"Oma" soh eejentlich ja net als wie en Oma uut: en stramm Fijürke en en elejant Kostüm, en propper Frisürke, strahlend witte Täng, en jesonge Kloer em Jesich on en resolude Stemm. Ärm wor se och net. Dat koss ech an de Klunker sehnn. "Oma" sooet em Cafee, direkt an dä Dösch näeweaan.
An dä Dösch sooete noch twee angere. Enne Mann on en Frommisch, die mech äwer dä Röck wiese deng. Mar höere köss ech se jood, of ech dat nau wolld of net: "Oma, hab ich das richtig verstanden? Du willst wieder auf Reise gehen?" Oma sait:" Ja, ja, gewiss Elvira, darum wollte ich Euch ja sprechen. Ich werde nächste Woche eine Weltreise antreten!"
Die Dauter schnappde noe Loff. "Auch noch eine Weltreise! Peter, hast Du das gehört? Oma will eine Weltreise machen!" Was sagst Du dazu?" Mar Pitter heel sech druut, hä hadde wal nix te kamelle. Die Dauter jeng nau an Boerd: Se mennde, dat se "Oma" doevan flöcks avbrenge möss. Dat köss se äwer net verstohnn, dat "Oma" nau och noch en Weltreis maake deng. No Afrika, Asie, Australie on sojar noch nach Amerika.
Doe söeet Oma jo mehr em Fliejer als dat se loope köss. Of se och an ehr Häz denke deng? Wat dann dä Doktor saage deng. Öwerhaups, wä sech öm dä Jaad kömmere deng on öm de Bloome em Huus? Och van et Jraav van Opa sprooek se lang on kloer. Of "Oma" och dodraan jedait hai, dat se sech vörher noch döckser impfe looete möss. Wäejes de Malaria on de Hepatitis. Wat se nau de Enkelkenger saage sollde, wenn die "Oma" nau en janz lange Tied net sehnn kösse.
"Oma" höerde jedoldij tuu. Mar wenn ehr Dauter dann de Wöed uutjenge, sait se för ehre Schweejersohn: "Sag Du doch auch mal was, lieber Peter!" Dä jröeselde sech eene on wesselde dann höeschkes:" Darf ich mitfahren, Oma?"

^ Zur Übersicht